Jergilikti qoǵamdastyqqa esep beretin polıtsııa qyzmetin qurý qajet - Memleket basshysy
ASTANA. QazAqparat - Jergilikti qoǵamdastyqqa esep beretin jergilikti polıtsııa qyzmetin qurý kerek. Búgin Aqordada qaıta taǵaıyndalǵan Úkimettiń alǵashqy keńeıtilgen otyrysynda QR Prezıdenti Nursultan Nazarbaev sot júıesindegi bylyqtardy synǵa aldy.
Eske salaıyq, jıyn barysynda Elbasynyń saılaý aldynda jarııalaǵan bes halyqtyq reformasyn júzege asyrý máseleleri talqylanýda.
Memleket basshysynyń aıtýynsha, jergilikti polıtsııa qyzmeti qoǵamdyq tártipke, turmystyq qylmystarǵa qarsy kúreske jaýap beredi, jol polıtsııasynyń qyzmetin de atqarady. «Biz bul týraly kóp aıtyp júrmiz, biraq oǵan áli barǵan emespiz. Bárin ortalyqta ustap otyrmyz. Eshkim jergilikti jerlerge qyzmetterdi bergisi kelmeıdi. Dál osy jergilikti polıtsııa qyzmeti jergilikti qoǵamdastyqpen tyǵyz jumys istep, usaq qylmystarǵa «nóldik tózimsizdikti» qalyptastyrýy kerek», -dedi N. Nazarbaev.
Osy rette Elbasy mysal retinde Astananyń ortalyǵyndaǵy Jansaıa turǵyn úı kesheninde bir apta ishinde bir ǵana kireberiste segiz páter tonalǵanyn tilge tıek etti. «Al uryny eshkim tappaıdy. Bul ne degen polıtsııa? Osyndaı jaǵdaıda urlyqtyń polıtsııamen birge jasalǵany týraly kúdik te keledi», - dedi N. Nazarbaev.
«Mundaı jaǵdaıda azamattarymyz ózin qaýipsiz sezine ala ma? Al ákimdik buǵan jaýaptan qashady, oǵan mınıstrlik jaýap berýi kerek. Sondyqtan da, Úkimettiń janynan, oblys ákimdikteriniń janynan polıtsııa qyzmetkerlerine azamattardyń shaǵymyn qaraıtyn qoǵamdyq keńester qurylýy kerek», - dedi Elbasy.
