Jergilikti bıýdjetti basqarý quqyǵy aýdan ákimderiniń jaýapkershiligin arttyra túsedi - Erkin Tuqymov

ASTANA. QazAqparat – Memleket basshysy Qazaqstan halqyna Joldaýynda aýdan ákimderine jergilikti bıýdjetti basqarý quqyǵyn berýdi usyndy. QR Prezıdenti janyndaǵy Qazaqstan strategııalyq zertteýler ınstıtýtynyń dırektory Erkin Tuqymov osyǵan qatysty pikir bildirdi, dep habarlaıdy QazAqparat tilshisi.

«Bul - aýdan ákimderi úshin ózin-ózi basqarý júıesinde múmkindik beretin mańyzdy qadam. Ákimderge aýdan qarajatyn jumsaǵanda ortalyq organdardyń san kelisimin alýdyń qajeti joq. Onyń ústine, ákim jergilikti máselelermen jaqsy tanys. Mektep salý kerek pe, emhana salý kerek pe?.. Ondaı sheshimderdi qabyldaǵanda uzyn-sonar kelisim jasaý tıimsiz. Qarjyny basqarýǵa kelgende ortalyqtandyrylǵan júıege táýeldi bolmaıdy», - dedi Erkin Tuqymov.

Instıtýt basshysynyń aıtýynsha, qarjyny basqarý quqyǵyn berý aýdan ákimderiniń erkin bolyp, óz betinshe sheshimder qabyldaýyna múmkindik beredi.

«Bir jaǵynan bul qural aýdan ákimderiniń halyq aldyndaǵy jaýapkershiligin arttyra túsedi. Bul - demokratııalyq praktıka», - deıdi ol.

Aıta ketsek, Memleket basshysy Qazaqstan halqyna Joldaýynda aýdan ákimderine jergilikti bıýdjetti basqarý quqyǵyn berýdi usynǵan edi.

«Aýdan ákimderine jergilikti bıýdjetti basqarý quqyǵyn bergen jón dep sanaımyn. Bul - eń aldymen, sol jerdegi máselelerdi jedel sheshý úshin qajet. Budan bólek, jergilikti bıýdjetke jınalatyn salyqqa qatysty jeńildikterdi anyqtaý quqyǵyn aımaqtardyń ózine berý máselesin qarastyrý kerek. Bul shara bıznestiń damýyna úlken serpilis ákelmek. Usynylyp otyrǵan bastama óte mańyzdy. Keleshekte aımaqtardyń tabysty damýyna aıryqsha yqpal etedi. Sol sebepti, barlyq ákim bıýdjetaralyq qatynastardyń jańa úlgisine kóshý kezinde onyń birtutas memleketimizge tıgizetin paıdasy jáne tıimdiligi týraly oılaýy kerek», - dedi Prezıdent.