Jergilikti bıýdjet kiristeri 75 mlrd teńgege artyq oryndaldy – Smaıylov

NUR-SULTAN. QazAqparat – 2020 jyldyń qańtarynda jergilikti bıýdjet kiristeri 75 mlrd teńgege artyq oryndaldy. Bul týraly Úkimet otyrysynda QR Premer-Mınıstriniń birinshi orynbasary - Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Jergilikti bıýdjetterdiń óz kiristeri 75 mlrd teńgege artyǵymen oryndalyp, 217 mlrd teńgeni qurady. Asyra oryndalý somasynyń 68 mlrd teńgesi salyqtyq túsimderge keledi. Kiristerdiń jospary barlyq óńirlerde artyǵymen oryndalyp otyr. Sebebi, jyldyń alǵashqy aılaryna, jergilikti bıýdjettiń kiristeri tómen josparlanǵan», - dedi ol.

Birinshi vıtse-premer buǵan orta jáne shaǵyn bıznesten túsetin korporatıvtik tabys salyǵynyń jergilikti bıýdjetterge túsýi de áser etip otyrǵanyn aıtty.

«Esepti kezeńde bul salyq boıynsha 27 mlrd teńge tústi», - dedi Álıhan Smaıylov.