Jergilikti atqarýshy organdar jas dárigerlerge áleýmettik qoldaý kórsetpeı otyr
NUR-SULTAN. QazAqparat – Jergilikti atqarýshy organdar jas dárigerlerdi áleýmettik qoldaý is-sharalaryn laıyqty deńgeıde qabyldamaı otyr. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.
«2020 jyly jumysqa ornalasqan 1 683 túlektiń tek 25 paıyzy, onyń ishinde aýyldyq jerlerde 37 paıyzy ǵana áleýmettik qoldaý is-sharalarymen qamtylǵan. Bul rette túlekterdi áleýmettik qoldaý is-sharalarymen qamtýdyń joǵary kórsetkishi Qostanaı oblysynda - 81, Soltústik Qazaqstan oblysynda – 70, Atyraý oblysynda – 57, Batys Qazaqstan oblysynda 51 paıyz bolsa, tómen qamtý Almaty oblysynda – 13, Aqtóbe oblysynda – 12 jáne Túrkistan oblysynda 7 paıyz ǵana», - dedi mınıstr.
Onyń aıtýynsha, aýyldyq jerlerge barǵan jas dárigerlerdi áleýmettik qoldaýmen eń tómen qamtý 5 oblysta tirkelgen. Naqty aıtqanda, aýylǵa barǵan mamandardyń Túrkistan oblysynda – 8, Almaty oblysynda – 9, Pavlodar oblysynda – 14, Mańǵystaý oblysynda – 29 jáne Shyǵys Qazaqstan oblysynda 35 paıyzy áleýmettik qoldaýmen qamtylǵan.
«Osylaısha, jergilikti atqarýshy organdar áleýmettik kepildendirýdi qamtamasyz etý jáne jergilikti jerlerge kadrlardy bekitý boıynsha is-sharalardy laıyqty deńgeıde qabyldamaı otyr», - dedi Alekseı Tsoı.
