Jergilikti atqarýshy bılik óńirdegi qylmystyq ahýaldy ózgertýge kóp mán berýleri kerek
ASTANA. QazAqparat - Jergilikti atqarýshy bılik óńirdegi qylmystyq ahýaldy ózgertýge kóp mán berýleri kerek. Búgin Májilistegi jergilikti polıtsııa qyzmeti taqyrybyna arnalǵan Úkimet saǵatynda qosymsha baıandama jasaǵan depýtat Nurlan Ábdirov osylaı málim etti.
«Quqyq buzýshylyqtyń aldyn alý máselesinde jergilikti ákimdikter men jergilikti polıtsııa qyzmeti arasyndaǵy qadamdardy, ádisterdi túbegeıli ózgertý talap etiledi. Statıstıkaǵa qaraıyq, Bas prokýratýranyń málimetteri boıynsha, 2016 jyldyń birinshi toqsanynda qylmystyń qaıtalanýy joǵary deńgeıdi kórsetti, osyndaı 5 myń qylmys tirkelgen. Budan bólek, qylmystyq quqyq buzýshylyqqa kelsek: jasóspirimer qylmysy - 12,4 paıyzǵa, ishimdik ishý saldarynan oryn alǵan qylmys - 15,4 paıyzǵa, qoǵamdyq oryndardaǵy qylmys - 21,6 paıyzǵa, otbasylyq-turmystyq saladaǵy qylmys - 55,9 paıyzǵa artqan», dedi N. Ábdirov.
Onyń aıtýynsha, jergilikti ákimdikter bas bostandyǵynan aıyrý mekemesinen bosaǵandarǵa kómek berý sharalarymen kóbirek aınalysýy kerek.
«Barlyq damyǵan elderde jergilikti bılik osyǵan barynsha mán beredi. Sondyqtan da, óńir ákimdikteri bas bostandyǵynan aıyrylǵandardyń bilim alýyn, densaýlyǵyn, eńbekpen qamtylýyn ózderi qadaǵalaýy kerek. Ákimderdiń osyndaı qoldaýynsyz, bul salada birdeńe ózgertý qıyn. EYDU elderiniń tájirıbesine sáıkes, jergilikti bılik qalyptasqan jaǵdaıdy ózgertýge zor úles qosa alady», dedi N. Ábdirov.
