Jerge tastaǵan qoqys ózimizge aýrý bolyp jabysatynyn túsinýimiz kerek - ekobelsendi

NUR-SULTAN. QazAqparat – Qazaqstan NUR ALEM pavılonynyń jetekshisi, ekobelsendi Ásem Omar ekologııalyq máseleler sheshimin tabýy úshin úgit-nasıhat jumystary toqtamaı júrgizilýi kerek dep esepteıdi, dep habarlaıdy QazAqparat tilshisi.

«Ekologııalyq bilim ár otbasynan bastalýy tıis. Balaǵa tabıǵat pen týǵan jerine degen qamqorlyǵyn, aıaýshylyǵyn úıindegi ata-ájesi, ákesi men sheshesi oıatýy kerek. Ol kisilerdiń ózi bilimdi bolǵany abzal. Ata-babalarymyzdan qalǵan jerge nemquraıly qaraýǵa bolmaıdy. Jerge tastaǵan qoqys – ózimizge aýrý bolyp jabysatynyn túsinýimiz kerek», - dedi Ásem Omar OKQ-da ótken baspasóz máslıhatynda.

Onyń keltirgen deregine sensek, qazirgi ýaqytta álem boıynsha qaıtys bolatyn adamnyń árbir altynshysy aýanyń lastanýy saldarynan ómirimen qoshtasýda. Dúnıe júzindegi teńizder men muhıttarǵa 15 mıllıard tonnadan astam qoqys tastalyp, budan adamdar da, jan-janýarlar da zardap shegip jatyr.

«Mine, sol sebepti biz eń aldymen ekologııalyq bilimdi adamdardyń sanasyna sińirýimiz kerek. Qoqys tastama, sýdy lastama, ormanǵa bardyń ba, ot jaq pa degen syńaıdaǵy máseleler tóńireginde úgit-nasıhat jumystary toqtamaı júrgizilýi kerek», - dedi ol.

Eske sala ketsek buǵan deıin Ásem Omar ekologııa máseleleri tóńireginde QazAqparat agenttigine suhbat bergen edi.