Jerge qatysty aqparattar ashyq ári qoljetimdi bolýy shart - T. Asanov
ASTANA. 5 qarasha. QazAqparat - Búgin Parlament Májilisinde jer resýrstaryn basqarý máselesi jóninde ótken Úkimet saǵatynda depýtat Turarbek Asanov osylaı málim etti.
«Qazirgi tańda qaı óńirge barsaq ta jer máselesi aldymyzdan shyǵady. Buryn respýblıka boıynsha Jer komıteti degen bir ǵana mekeme bolýshy edi, qazir osy jerdiń aınalasyndaǵy mekeme qaptap ketkeni de ras. Sondyqtan qarapaıym halyq jerge qatysty naqty aqparatty bile almaı otyr. Kerek deseńiz, jer týraly derekterdi osymen aınalysatyn sheneýnikter jáne jer satýdy kásip etken deldaldar monopolııa jasap alǵan. Úles alǵysy keletin azamattar osylardyń arasynan tanys izdeýge de májbúr bolyp júr», - deıdi T. Asanov. Osyǵan oraı, depýtattyń oıynsha, elimizdegi bos jáne satylymǵa túsetin jerdiń ár sharshy metri týraly aqparat ashyq ári qoljetimdi bolýy tıis. «Bul úshin jer týraly arnaıy derekqor qurylsa da ıgi», - dedi ol.
