Jerge baılanysty máselege núkte qoıyldy- Aýyt Muqıbek

ALMATY. QazAqparat – Prezıdent Qasym-Jomart Toqaev Ulttyq qoǵamdyq senim keńesiniń besinshi otyrysynda bes máselege toqtaldy. Bul týraly Qoǵam qaıratkeri, QR Prezıdenti janyndaǵy Ulttyq qoǵamdyq senim keńesiniń múshesi Aýyt Muqıbek aıtty, dep habarlaıdy QazAqparat tilshisi.

«Erekshe toqtalyp aıtaıyn degenim, uzaqtan beri daý bolyp, halyqtyń kóńilin kúpti qylyp kele jatqan jerge baılanysty máselege núkte qoıyldy. «Sheteldikterge jáne sheteldik zańdy tulǵalarǵa aýyl sharýashylyǵy jerlerin satýǵa, jalǵa berýge zań júzinde birjola tyıym salýdy tapsyramyn», -dedi Prezıdent. Jáne bul tapsyrmany tez arada oryndaýdy uıǵardy. Jalpy, jurttyń kútkeni de osy edi. Bul Qasym-Jomart Toqaevtyń qoly arqyly qazaq tarıhyna altyn árippen jazylǵan sheshim boldy»,-deıdi Aýyt Muqıbek.

Sonymen qatar, ol Memleket basshysynyń bul sheshimin tarıhı oqıǵa retinde baǵalaıtynyn jetkizdi.

«Taǵy bir rıza bolǵanym, Qasym-Jomart Kemeluly toqtalyp, tapsyrma bergen bes máseleniń beseýi de qarapaıym halyqtyń ómiri men turmysyna qatysty bolǵany. Mysaly,Turǵyn-úı jáne ekonomıka saıasatyn jetildirý. Endigi ýaqytta aýyldy jerlerge turǵyn úı salǵan kompanııalardyń jalpy shyǵynynyń jartysyn úkimet tólep beretin boldy. Bul da keremet bastama der edim. Aýyl halqynyń qalaǵa aǵylýyn toqtatýǵa, aýyl sharýashylyǵyn damytýǵa óte paıdaly sheshim», - deıdi ol.

Qoǵam qaıratkeri, keńeste múmkindigi shekteýli adamdardyń da máselesi nazardan tys qalmaǵanyn atap ótti.

«Prezıdent múgedektikti anyqtaý rásimderin túbegeıli jeńildetýdi tapsyrdy. Shyny kerek, «Nur Otan» partııasyna múgedektik mártebe alýdyń qıyndyǵy týraly azamattar kóp aryzdanady. Mine, Qudaıǵa shúkir, bul másele de óz sheshimin tapty. Qysqartyp aıtqanda, óz basym Prezıdenttiń búgingi sheshimderi men tapsyrmalaryna qatty rıza boldym»,- dep túıindedi Ulttyq qoǵamdyq senim keńesiniń múshesi.