Jerdiń tozýynyń teris áseri qazirden sezilýde – Erlan Qoshanov
Seýlde Ortalyq Azııa elderi men Koreıa Respýblıkasy arasyndaǵy yntymaqtastyq máseleleri jónindegi parlament spıkerleriniń I keńesi ótti. Oǵan Májilis tóraǵasy Erlan Qoshanov bastaǵan palata depýtattary qatysty, dep habarlaıdy QazAqparat QR Parlamenti Májilisiniń baspasóz qyzmetine silteme jasap.
Kezdesýdiń negizgi otyrysy Ortalyq Azııa elderi men Koreıa arasyndaǵy óńirlik yntymaqtastyqtyń basymdyqtaryna arnaldy. E.Qoshanov óńirdegi qaýipsizdikti qamtamasyz etý basty máseleniń biri ekenine nazar aýdaryp, Qazaqstan parlamentshileri aımaqtaǵy turaqtylyqty saqtaýǵa bar kúsh-jigerin salyp jatqanyn aıtty.
Yntymaqtastyǵymyzdyń ózekti máseleleri qatarynda klımattyń ózgerýine qarsy kúres, qorshaǵan orta men bıoalýantúrlilikti saqtaý, sý resýrstaryn, sonyń ishinde transshekaralyq resýrstardy tıimdi paıdalaný men qorǵaý bolýǵa tıis, – dedi palata spıkeri.
Májilis tóraǵasy qazirdiń ózinde Ortalyq Azııa turǵyndary Aral teńiziniń ekologııalyq apatynyń, muzdyqtardyń erýi jáne jerdiń tozýynyń teris áserin sezinip otyrǵanyn atap ótti. Osy oraıda Erlan Qoshanov koreılik jetekshi mamandarmen tájirıbe almasýǵa shaqyrdy.
Talqylaý arnaýly eki sessııada ári qaraı jalǵasyn tapty. Qatysýshylar Ortalyq Azııa men Koreıa Respýblıkasy arasyndaǵy úzdiksiz óńirlik ekonomıkalyq yntymaqtastyqtyń múmkindikteri men tsıfrlyq transformatsııa salasyndaǵy qarym-qatynas týraly pikir almasty. Májilis spıkeri Memleket basshysynyń bastamasymen jýyrdaǵy Joldaýynda aıtylǵan jańa ekonomıkalyq modeldi iske asyrýǵa Qazaqstan kiriskenin atap ótti. Munda bizdiń elimiz Koreıa Respýblıkasymen ınnovatsııa, jasyl tehnologııalar, energetıka, ónerkásip óndirisi, IT jáne bank sektoryndaǵy yntymaqtastyqtyń zor perspektıvalaryn ańǵaryp otyr.
Sóz sońynda Erlan Qoshanov qazirgi ýaqytta Ortalyq Azııa óńirinde ekonomıka, saıasat jáne mádenı baılanystar qarqyndy damyp jatqanyna nazar aýdardy. Munyń bári Koreıa Respýblıkasymen óńirlik yqpaldastyqty arttyrý úshin jańa múmkindikterge jol ashady.
Іs-shara qorytyndysy boıynsha «Bolashaqqa baǵdarlanǵan ózara tıimdi qatynastardy damytý» taqyrybyndaǵy alǵashqy kezdesýdiń birlesken deklaratsııasy qabyldandy.
