Jerdiń qorǵanysh ozon qabaty qalpyna kelip jatyr — meteorologter

ASTANA. KAZINFORM — Álemdik meteorologııalyq uıymnyń (ÁMU) derekterine sáıkes, 2024 jyly ozon tesigi 2020-2023 jyldar aralyǵymen salystyrǵanda kishireıgen, dep habarlaıdy DW.

Uıymnyń málimdeýinshe, ozon qabatynyń qalpyna kelýine tabıǵı atmosferalyq qubylystar, sonymen qatar buryn tońazytqyshtar, kondıtsıonerler, órt sóndirgish kóbik pen shashqa arnalǵan lak óndirisinde qoldanylǵan ozon qabatyn buzatyn zattardan birtindep bas tartý áser etken kórinedi.

Meteorologterdiń 2022 jylǵy esepteýlerine qaraǵanda, ozon qabaty osy ǵasyrdyń ortasyna deıin 1980-jyldar deńgeıine jetýi múmkin.

Arktıka ústinde – 2045 jylǵa deıin, al Antarktıka ústinde – 2066 jylǵa deıin qalpyna keledi dep boljanyp otyr.

Jer atmosferasyndaǵy ozon qabatynyń buzylýy ǵalamshar betinde zııandy ýltrakúlgin sáýlelenýdiń kóbeıýine ákeledi. Bul adamda teri qaterli isigi men katarakta aýrýlarynyń artýyna, sondaı-aq ósimdikter men janýarlardyń zardap shegýine sebep bolady.

Budan buryn qytaılyq ǵalymdar ǵalamshararalyq saıahatqa yńǵaıly kıim oılap tapqanyn jazǵan edik.