Jerdiń qasynan bas súıek túrindegi óli kometa ushyp ótti
ASTANA. QazAqparat - Senbi kúni keshke Jerdiń qasynan pishini jaǵynan bas súıegine uqsas kometa ushyp ótti, dep habarlaıdy Ýtro.rý.
Ǵalymdar áýeli Jerge alyp asteroıd jaqyndap keledi dep shamalap otyrǵan, odan keıin NASA-da másele Kúndi kóp ret aınalý kezinde óz materııasynyń aıtarlyqtaı bóligi men quıryǵyn joǵaltyp alǵan óli kometa týraly bolyp otyrǵanyn naqtylady.
«Úlken asqabaq» dep atalyp ketken ǵarysh nysanyna 2015 TB145 nómiri berildi, onyń dıametri - 400 metr, 35 shaqyrym-sek jyldamdyqpen qozǵalady.
Astronomdardy kometanyń paıda bolýynan keıin ol týraly óte kesh - 10 qazan kúni ǵana bilgendikteri tańdandyrdy. Eger aspan denesi Jer úshin qaýipti bolsa, ony aldyn alý bylaı tursyn, qulaýyna daıyndalýǵa da ýaqyt jetispes edi.
