Jerdiń elektrondyq kadastry engiziledi - Asqar Myrzaxmetov

ASTANA. QazAqparat - Premer-Mınıstrdiń orynbasary - Aýyl sharýashylyǵy mınıstri Asqar Myrzaxmetovtyń aıtýynsha, tsıfrlandyrý sharalary aıasynda jer kadastryn da elektrondyq úlgige aýystyrý josparlanǵan, dep xabarlaıdy QazAqparat tilshisi.

«Kúni keshe biz «Jer kodeksi týraly» Zań jobasynyń qorytyndysyn tanystyrǵanda aýyldy jerlerdi ınternetpen qamtý máselesin kóterdik. Búginde naqty kórsetkishterdi anyqtaý qajet. Sonyń negizinde atalǵan Zań jobasyna jerdiń elektrondyq kadastryn engizý merzimin engizetin bolamyz», - dedi Myrzaxmetov Úkimettiń búgingi otyrysynda.

Búginde mınıstrlik aýyldy jerlerge ınternetti tartý aıasynda astyq qolxattaryn engizý jumystaryn bastap ketti. Atalǵan bastamanyń tıimdi tustary barshylyq. Alaıda barlyq aýyldy jerlerde keń jolaqty ınternet bolmaǵandyqtan, jańa júıeni jappaı taratý múmkin bolmaı otyr.

Jalpy, barlyq aýyldar ǵalamtorda qosylsa, jergilikti xalyq memlekettik qyzmetterdi onlaın rejımde alyp qana qoımaı, elektrondyq saýda-sattyqpen de aınalysa alady. Budan bólek, bilim berý men densaýlyq saqtaýdyń qyzmetterin úıden shyqpaı-aq alýǵa múmkindik bar.

Aıta keteıik, Úkimettiń búgingi otyrysynda QR Aqparat jáne kommýnıkatsııalar mınıstri Dáýren Abaev aýyldardy keń jolaqty ınternetke qosý josparyn jarııalady .  Úkimet basshysy memlekettik mańyzy bar osy mindetti ýaqytynda oryndaýdy tapsyrdy .