Jerdiń bazalyq stavkasyn jergilikti atqarýshy organdar bekitýi tıis - Jer resýrstaryn basqarý agenttigi
áýirdiń 19-y. QazAqparat /Aıdar Ospanalıev/ - «Jerdiń naryqtaǵy baǵasynyń jaǵdaıyna qajet ýaqytynda jedel túrde shara qoldaný úshin jerge tólenetin bazalyq stavkalardy bekitýdi jergilikti atqarýshy organdardyń quzyryna berý kerek», dedi búgin Jer resýrstaryn basqarý agenttigi tóraǵasynyń orynbasary Qanalbek Raıymbekov.
Bul týraly ol búgin BNews.kz portalynda ótken ınternet-konferentsııa barysynda málim etti, dep habarlaıdy QazAqparat.
Onyń sózine qaraǵanda, qazirgi tańda atalmysh máseleni Úkimet retteıdi. «Úkimet qarjy mınıstrligi jáne basqa da qurylymdar arqyly máseleni rettegenshe birshama ýaqyt ótedi. Al jergilikti atqarýshy organdar bazalyq stavkanyń mólsherin naryqtaǵy baǵanyń deńgeıine qaraı jedel ózgerte alady. Bul durys sheshim dep oılaımyn. Óıtkeni bul usynysty qazir Úkimettiń ózi de qoldap otyr. Oǵan qatysty zań jobasy qazir májilistiń qaraýynda», dedi agenttik tóraǵasynyń orynbasary.
Sondaı-aq onyń sózinshe, búginde Almaty men Astana qalalarynda jáne oblys ortalyqtarynda jerge degen baǵa turaqty. Naqtyraq aıtqanda, osy ýaqytqa deıin jerdiń naryqtyq baǵasy kadastr baǵasynan aıtarlyqtaı tómen bolatyn. «Qazir onyń ekeýi de bir-birimen teńesti», dedi Q.Raıymbekov.
