Jerdiń bássaýdaǵa túsýi baspanany qymbattatady - kásipker
AQTÓBE. QazAqparat - Jerdiń bássaýdaǵa túsýi baspana baǵasyn qymbattatady. Bul týraly aqtóbelik kásipker Shamıl Kaspranov aıtty, dep habarlaıdy QazAqparat tilshisi.
Aqtóbede kommertsııalyq, memlekettik baǵdarlamamen áleýmettik turǵyn úı qurylysyn júrgizetin kompanııa basshysy Shamıl Kaspranov jerdiń bássaýdaǵa túsýine qarsy. Ol aýktsıon kezinde jerdiń quny eselep qymbattap, páter baǵasynyń ósýine sebep bolatynyn jasyrmady.
«Kompanııa jylyna 5 gektar jer alyp, qurylys jumystaryn júrgizedi. Jer bássaýdaǵa túsip, páter baǵasy kóterilip jatyr. Ári biz ınjenerlik ınfraqurylymdy júrgizemiz. Sondyqtan kópqabatty úıge arnalǵan jerdi kadastrlyq qunymen satýdy suraımyz. Sý, jaryq, jylý jelisin tartý ár kompanııaǵa mindettelgen. Ári jaz aılarynda óńirde qurylys materıaldary tapshy bolady. Kirpish, tsement az. Sol sebepti Reseıge táýeldilik kúsheıdi. Metall, áınek, aǵash, tsement. Bárin Reseıden tasımyz. Qazaqstanda shyǵarylatyn tsementti alý qarjylyq jaǵynan tıimsiz. Zaýyt shalǵaı, Aqtóbege tasý qosymsha shyǵyn bolady»,- dedi kásipker Shamıl Kaspranov.
Kásipker ınjenerlik jelilerdi tartý jobasyn bir ınstıtýttyń mindetine júkteýdi surady. Eger joba daıyn bolsa, qurylys kompanııasy satyp alýǵa, alańsyz jumys júrgizýge múmkindik alady.
