Jerdi zańsyz kepilge berý faktisi boıynsha 6 qylmystyq is tergelip jatyr

ASTANA. QazAqparat – Elimiz boıynsha paıshylarǵa 546 myń gektar jer qaıtaryldy. Bul jaıynda Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.

«Bas prokýratýra bankterde jáne ózge de qarjy uıymdarynda zańsyz salynǵan aýyl sharýashylyǵy jerlerin baqylaý jónindegi jumysty júıeli negizde júrgizedi. Ol úshin ákimdikter janynda quqyq qorǵaý organdarynyń qatysýymen jer zańnamasy salasyndaǵy problemalyq máselelerdi sheshý boıynsha vedomstvoaralyq jumys kishi toptary jumys isteıdi», - delingen Roman Sklıardyń jaýabynda.

Onyń atap ótýinshe, prokýratýra organdary shartty jer úlesterin paıdalaný jáne paıshylardyń quqyqtaryn qorǵaý máselelerin retteý salasynda zańdylyqtyń saqtalýyna tekserý júrgizedi.

«Prokýrorlardyń qabyldanǵan is-sharalarymen el boıynsha paıshylarǵa 546 myń gektar jer qaıtaryldy. Zańsyz kepil jáne jerdi qaıta resimdeý faktileri boıynsha 6 qylmystyq is tergelýde. Máselen, 81 myń paıshydan turatyn jáne 4,1 mln gektar aýyl sharýashylyǵy alqaptary bar 169 problemalyq kásiporyn anyqtaldy. Onyń ishinde 868 myń gektar jer zańsyz kepilge berilgen. 20 myń paıshynyń múddesi úshin prokýrorlar sottarǵa 350 myń gektar jerdi menshik ıelerine qaıtarý týraly 30 talap aryz berdi. Vedomstvoaralyq kishi toptardyń jumysy turaqty negizde júrgiziledi. Osyǵan baılanysty jańa komıssııa qurý qajettiligi joq», - dedi ol.