Jerdi tıimdi paıdalanbaıtyndar ony qaıtarýy kerek - Qumar Aqsaqalov
SQO-da tıimdi paıdalanylmaǵan jerler memleket menshigine qaıtarylady. Depýtattar aldynda esep bergen oblys ákiminiń aıtýynsha, tekserý nátıjesinen keıin 2015 jyldan beri 662,5 myń ga alqaptaǵy ýchaskeler basqalarǵa berilgen. Egistikke beıjaı qaraǵan sharýalar saldarynan tómen ónim alady. Jerdi kútip-baptamaǵannan keıin onyń qunary joıylady.
«Shaǵala agro» JShS men «Krahmal agro» JShS-niń egis alqaptarynyń aýmaǵy birdeı, 7 myń gektardan. Alaıda, «Shaǵala agro» ár gektardan - 35 tsentner alsa, ekinshisiniń ónimi odan 33%-ke tómen. Sonyń saldarynan eńbekaqyda da úlken aıyrmashylyq bar, túsetin salyq ta az», - deıdi Qumar Aqsaqalov.
SQO-da 287 sharýashylyqqa potentsıalyn anyqtaý maqsatynda saraptama jasalyp, olar úzdik-ortasha-artta qalǵan qaǵıdaty boıynsha 3 sanatqa bólindi. Birinshi sanatqa 7 kásiporyn jeti kórsetkish boıynsha engen. Bul jerde joǵary eńbekaqy, iri sút-taýarly fermanyń, bordaqylaý alańynyń jáne iri qaranyń bolýy, dándi daqyldardan joǵary ónimdilik, tehnıkany jańartyp otyrýy jáne aýyldyń áleýmettik damýyna úles qosýy esepke alyndy.
Úzdikterdiń qataryna «Daıyndyq Agro», «Ivan Zenchenko», «Taıynsha-Astyq», «Noǵaıbaı», «Zagradovskoe», «Prometeı Agro» JShS-teri jáne «Zenchenko ı K» KS-i endi. Ortasha kórsetkishi bar sharýashylyqtardyń sany - 64 bolsa, artta qalǵandar – 194.
Artta qalǵan sharýashylyqtardyń ıeliginde qazir 1,7 mln ga alqap bar. Olar ár gektardan 10 tsentnerge jetpeıtin ónim alady. Memleket qoldaý kórsetip, sýbsıdııa bergenimen, olardan, ázirshe, qaıtarym joq.
«Biz bul sharýashylyqtardyń sanyn kemitý úshin jumys isteımiz. Ónimdilikti arttyratyn bolsaq, onyń nátıjesin ár jumysshy kóretin bolady. Ásirese kósh sońynda júrgender jaǵdaıdy durystaýǵa tyrysýy kerek. Ár sharýashylyq basshysyna, aýdan ákimderine mindet qoıyldy», - dedi óńir basshysy.
Qumar Aqsaqalovtyń aıtýynsha, Prezıdent agroónerkásiptik keshendi damytý boıynsha naqty maqsattardy belgiledi. Sonyń negizgileri eksport kólemin 2,5 ese ulǵaıtyp, aýyl sharýashylyǵy salasyndaǵy ónimdilikti arttyrý.
«Bul baǵyttaǵy jumystar jalǵasyn tabady» dep qorytyndylady óz sózin oblys ákimi.
