Jerdi tabystaý qala ákimdiginiń kelisimimen júzege asýy tıis – Baqytjan Bazarbek

NUR-SULTAN. QazAqaparat – Jer kodeksiniń 108, 109-babyna «Respýblıkalyq mańyzy bar qala mańyndaǵy kez kelgen jerdi tabystaý, jerdiń nysanaly maqsatyn aýystyrý týraly sheshimderi iri qalalardyń ákimdiginiń ózara kelisimimen júzege asyrylýy tıis» degen normany engizý kerek. Bul týraly QR Aýyl sharýashylyǵy mınıstrligi jer reformasy komıssııasynyń otyrysynda zańger Baqytjan Bazarbek aıtty, dep habarlaıdy QazAqparat tilshisi.

«Bizdiń elde qala mańyndaǵy aýmaqtarǵa qatysty qabyldanǵan qaýlylar is júzinde jumys istemeıdi. Nur-Sultan, Almaty, Shymkent sııaqty úlken qalalar mańyndaǵy ákimdikterde jerdi berý, jerdiń nysanaly maqsatyn aýystyrýǵa qatysty sybaılas jemqorlyqtyń dárejesi sharyqtap ketken. Sondyqtan Jer kodeksiniń 108, 109-babyna «Respýblıkalyq mańyzy bar qala mańyndaǵy kez kelgen jerdi tabystaý, jerdiń nysanaly maqsatyn aýystyrý týraly sheshimderi iri qalalardyń ákimdiginiń ózara kelisimimen júzege asyrylýy tıis» degen normany engizý kerek. Sonda ǵana osyndaı máseleniń aldyn alamyz», - deıdi «Bazarbek&Partners» zań kompanııasynyń bas dırektory Bazarbek Jumabekuly.

Sondaı-aq, ol jerge ornalastyrý jumysynyń sapasy syn kótermeıtinin aıtty.

«Jerge ornalastyrýshylar óte úlken qatelikke boı aldyryp otyr. Bul jerde sot sheshimimen jeriniń bir bóliginen aıyrylǵan qarapaıym azamat, zańdy tulǵalar zardap shegedi. Jer komıssııasynyń jumysy aıasynda jerge ornalastyrý jumysyn lıtsenzııalaý jáne jerge ornalastyrý jumysyn qaıta attestatsııalaý sııaqty usynysty sheshýimiz kerek. Qazirgi tańda jerge ornalastyrýǵa qatysty mamandyq ta, tájirıbe de joq. Bul salada esh tájirıbesi joq mamandar jumys isteýde. Osy olqylyqtyń ornyn toltyrýymyz kerek», - deıdi ol.