Jerdi paıdalanýshylardyń quqyqtaryn qorǵaý men jaýapkershilik kúsheıtiledi - Berik Ospanov
Aıta keteıik, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine jer qatynastaryn damytý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
«Memleket basshysynyń tapsyrmasymen Jer reformasy jónindegi komıssııa qurylǵanyn bilesizder. Naýryz aıynyń sońynan bastap bir aı kóleminde biraz máseleni talqylap, tıisti zań jobasy ázirlendi. Osy oraıda jalǵa alý quqyqtaryn jetildirý máselesi qaraldy. Sonymen qatar, qazaqstandyqtarǵa jekemenshikke jer berý máselesi boıynsha naqty kelisim bolmaǵannan keıin, usynys boıynsha moratorıı 5 jylǵa uzartylyp jatyr. Bul baǵytta tolyq sheshim joq, ıaǵnı jekemenshik kerek nemese jekemenshik kerek emes degen pikir bar. Sondyqtan bul másele taǵy qoǵamdyq talqylaýda bolady dep, tıisti usynys jasaldy», - dep toqtaldy B. Ospanov.
Onyń aıtýynsha, qazirgi kezde ortalyq deńgeıdegi quzyrly organ – Aýyl sharýashylyǵy mınıstrliginde jer zańnamasyn saqtaý, jer sapasyn qorǵaý, maqsatty paıdalanýdy qadaǵalaý jóninde ókildigi bolmaı tur. Bul fýnktsııalar óńirlerge júktelgen.
«Sol sebepti sońǵy jyldary zań buzýshylyq jaǵdaılary kóbeıip ketken. Endi jańa zań jobasy óńirlik deńgeıden respýblıkalyq deńgeıge baqylaý men tekserý fýnktsııalaryn qaıtadan ortalyqqa berý boıynsha óziniń sheshimin taýyp otyr. Sonymen birge, jer paıdalanýshylardyń quqyqtaryn qorǵaý jaǵynan qosymsha múmkindikter eskerilgen. Munymen qosa, olardyń jaýapkershiligi de kúsheıtilmek, ıaǵnı jerdi maqsatty paıdalanbasa, onda jaýapkershilik bolady», - dedi depýtat.
Onyń sózine qaraǵanda, qujat aıasynda derekter ashyqtyǵyna ekpin qoıylǵan. Jerdi alǵan azamattar men mekemeler týraly málimetter ashyq qoljetimdi bolady.
«Kópshiliktiń usynysy boıynsha biraz ózgeris engizilgen. Jumys tobynyń qyzmeti barysynda qosymsha zańnyń normalaryn kúsheıtetin, naqtylaıtyn tıisti ózgerister qujatqa engizilgen bolatyn. Búgin birinshi oqylymda maquldandy. Endi ekinshi oqylymǵa deıin talqylanatyn birqatar norma bar. Jumys tobynyń otyrysyna 40-qa jýyq adam adam qatysyp keledi. Olardyń arasynda depýtattar, múddeli memlekettik organdardyń ókilderi, «Atameken» UKP ókilderi, saıası partııalardyń músheleri, qoǵam qaıratkerleri, sala mamandary atsalysyp jatyr. Bizdiń ustanymymyz – Jer reformasy jónindegi komıssııasynyń sheshimderin zańdastyrý», - dedi Berik Ospanov.
Budan bólek ol zań jobasy aıasynda aýyldyń mańyndaǵy jerlerdi eldiń paıdalanýyna qaıtarý, eldi meken aınalasyndaǵy jaıylymnyń kólemin anyqtaý jóninde tıisti qadamdar eskerilgenin atap ótti.
Zań jobasynyń negizgi ózgeristeri men tolyqtyrýlary:
- qazaqstandyqtarǵa jáne qazaqstandyq zańdy tulǵalarǵa aýyl sharýashylyǵy maqsatyndaǵy jerlerdi 49 jylǵa deıingi merzimge jalǵa berý;
- Jer resýrstaryn basqarý komıtetine jerdi paıdalaný men qorǵaýdy memlekettik baqylaý fýnktsııalaryn ákimdikterden qaıtarý;
- aýyl sharýashylyǵy jerleriniń nysanaly maqsatyn «baǵbandyq» jáne «saıajaı qurylysyna» ózgertýge tyıym salý;
- halyqtyń muqtajyn qanaǵattandyrý maqsatynda, jergilikti jaǵdaılardy eskere otyryp, jaıylymdardy basqarý jónindegi josparlarda, qajetti jaıylym alqabynyń shekarasyn aıqyndaý;
- aýyl sharýashylyǵy maqsatyndaǵy jerlerdi jeke menshikke berýge moratorııdiń qoldanylý merzimin 2026 jylǵy 31 jeltoqsanǵa deıin uzartý.
