Jerdi paıdalanýǵa baqylaý júrgizetin organdardyń ókilettigi qaıta qaraldy

ASTANA. QazAqparat – Senattyń jalpy otyrysynda «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» Zań maquldandy, dep habarlaıdy QazAqparat tilshisi.

Zańnyń negizgi maqsaty - jer zańnamasynyń jekelegen erejelerin buzǵany úshin ákimshilik jaýapkershilikti belgileý jáne jerdi paıdalaný men qorǵaýda memlekettik baqylaýdy júzege asyratyn organdarǵa ákimshilik isterdi qaraý ári tıisti jaza qoldaný boıynsha ókilettikter berý.

«Bul zań jer zańnamasyn buzǵany úshin jekelegen baptar boıynsha ákimshilik jaýapkershilikti naqtylaýǵa arnalyp otyr. Sonymen qatar, zań aıasynda jerdi paıdalaný men qorǵaýǵa memlekettik baqylaý júrgizetin organdardyń ókilettikterin qaıta qaraý kózdelgen. Jańa normalar jer ýchaskesine quqyq berý kezinde sybaılas jemqorlyq táýekelderin joıýǵa jáne jerdi paıdalaný men qorǵaýǵa qatysty memlekettik baqylaýdy kúsheıtýge múmkindik beredi dep senemiz», – dedi Senat tóraǵasy Máýlen Áshimbaev.

Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń málimetine qaraǵanda, Zańmen jergilikti atqarýshy organdardyń zańsyz sheshimder qabyldaýyna, olardyń jer qatynastary salasyndaǵy mindetterin oryndamaýyna nemese ýaqtyly oryndamaýyna qatysty máseleler retteldi. Osy oraıda jer resýrstaryn qorǵaý jáne paıdalaný salasyndaǵy kemshilikter úshin jer quqyqtyq qatynastary sýbektileriniń qosymsha ákimshilik jaýapkershiligi belgilenedi.