Jerdi paıdalanýǵa baqylaý mindetti túrde kúsheıtiledi - mınıstr
Paıdalanylmaı jatqan jerler taqyrybyna toqtalǵan mınıstr, «Aýyl sharýashylyǵy maqsatyndaǵy jerlerdiń paıdalanylýyn baqylaýdy mindetti túrde kúsheıtetin bolamyz. Munda bizge zamanaýı ǵaryshtyq monıtorıng ádisteri kómekke keletin bolady, bulardy júzege asyrýǵa zańnamalyq baza daıyn. Búgin kórmede Sizderge aýyl sharýashylyǵy maqsatyndaǵy jerlerdi ǵaryshtyq monıtorıngteýdiń 4 tásildemesi tanystyryldy. Munyń artyqshylyǵy – ashyqtyǵy men adamı faktordyń bolmaýynda. Aqmola, Qostanaı, Shyǵys Qazaqstan jáne Mańǵystaý oblystaryndaǵy ǵaryshtyq monıtorıng boıynsha qanatqaqty jobany iske asyrý barysynda barlyq máseleler retteledi dep oılaımyn», - dedi mınıstr Senatta agroónerkásiptik keshendi damytý taqyrybyna arnalǵan parlamenttik tyńdaýda.
Onyń sózine qaraǵanda, atalǵan tórt oblysta bıyldyń 1 mamyryna deıin qanatqaqty joba júrgiziledi.
«Jalpy, jerdi ǵaryshtyq monıtorıngteý qazirgi kezde ózekti bolyp otyr, alaıda, ǵaryshtyq túsirilimderdi baqylaýsyz paıdalaný kútiletin nátıjeler bermeıdi. Sondyqtan bul máselede memlekettik retteýdi pysyqtaý jáne keleshekte jerlerdi ǵaryshtyq monıtorıngteýdiń biryńǵaı tuǵyrnamasyn qurýǵa tyrysý qajet dep oılaımyn. Bul jumyspen biz qazir aınalysyp jatyrmyz», - dep túsindirdi vedomstvo basshysy.
S. Omarovtyń aıtýynsha, paıdalanylmaı jatqan jerlerdi alyp qoıý máselesin jedeldetý úshin mınıstrlik jer, kásipkerlik jáne salyq kodeksterine tekserý kezeńderin azaıtýdy jáne paıdalanylmaıtyn jerlerdi alyp qoıý merzimderin 2 jyldan 1 jylǵa qysqartýdy, sondaı-aq paıdalanylmaıtyn jerlerge salynatyn salyqty 20 esege ulǵaıtýdy kózdeıtin túzetýler ázirledi.
