Jerdi paıdalanbaı jatqandarǵa naqty sharalar qoldanylady – senator

NUR-SULTAN. QazAqparat – Jerdi paıdalanbaı jatqan latıfýdısterge naqty talap qoıý sharalary iske asyrylady. Bul týraly «Aýyl» partııasynyń tóraǵasy, Senat depýtaty Álı Bektaev málim etti, dep habarlaıdy QazAqparat tilshisi.

«Ulttyq qoǵamdyq senim keńesiniń otyrysynda Prezıdent Qasym-Jomart Kemeluly aýyl sharýashylyǵy jerlerin paıdalanýǵa qatysty naqty biraz máselelerdi kóterdi. Memleket basshysy halyqqa arnaǵan Joldaýynda da, odan keıin Aqmola oblysynda ótken úlken májiliste de jerdi sapaly túrde ıgerý taqyrybyna erekshe ekpin qoıdy. Ulttyq keńes otyrysynda jańa tehnologııalardyń múmkindigin keńinen paıdalanýǵa qatysty tapsyrma berilip, ǵaryshtan monıtorıngileý júıesi eskerilip otyr. Búginde tehnologııalar jetilgen, ǵaryshtyq baqylaý arqyly aýyl sharýashylyǵy jerleriniń ıgerilýi jaǵdaıyn anyq kórýge bolady. Sondyqtan jerdi paıdalanbaı jatqan latıfýdısterden, sharýa qojalyqtarynynan tıisti memorgandar tarapynan dáleldi túrde talap etýge múmkindik týdyrmaq», - dedi senator.

Sonymen qatar, M. Beketaev Ulttyq keńes otyrysynda ıgerilmeı jatqan jerlerdi májbúrlep qaıtaryp alýdyń ýaqytyn eki jyldan bir jylǵa deıin qysqartý qadamy kóterilgenin eske saldy.

«Qazir endi bir jyl merzim berý qarastyrylyp otyr. Bir jyl merzimde jer ıgerilmeıtin bolsa, ony qaıtarý múmkindigi jasalmaq. Sebebi aýyl sharýashylyǵy jerin ıgermeý degen shynynda da óte úlken qatelik, óte úlken kemshilik bolyp eseptelýi kerek», - dedi Álı Bektaev.

Munymen qosa, senator paıdalanylmaı jatqan egis alqaptary úshin saltyq salmaqty kóbeıtý túrindegi jaýapkershilikti arttyrý óte mańyzdy ekenin atap ótti.

Budan buryn habarlanǵandaı, Ulttyq qoǵamdyq senim keńes otyrysynda Prezıdent Qasym-Jomart Toqaev ıgerilmeı jatqan jer ýchaskelerine salynatyn bazalyq salyqty 10-nan 20 esege deıin arttyrýdy usyndy.

Sonymen qatar Memleket basshysy aýyl sharýashylyǵy jerlerin ǵaryshtan baqylaý boıynsha tapsyrmalar berdi.