Jerdi qaıtaryp alý ońaı sharýa emes, ol úshin jer ıesin sotqa berýge týra keledi - AShM

NUR-SULTAN. QazAqparat – Bıyl paıdalanylmaı jatqan 5 mln gektar aýyl sharýashylyǵy jeri memleket menshigine qaıtarylady. Bul týraly QR Aýyl sharýashylyǵy vıtse-mınıstri Ábilhaıyr Tamabek aıtty, dep habarlaıdy QazAqparat tilshisi.

«Mınıstrliktiń 2021 jylǵy 26 shildedegi №223 buıryǵymen «jappaı qaýip» uǵymyn aıqyndaý jónindegi usynymdar bekitildi. Al 2022 jylǵy 4 mamyrdaǵy №139 buıryqqa sáıkes, «jappaı qaýip» aıasynda jalpy alańy 5,8 mln gektardy quraıtyn 1 901 shaǵyn kásipkerlik sýbektisine qatysty jospardan tys tekserý júrgizilip jatyr», - dedi Ábilhaıyr Tamabek ortalyq kommýnıkatsııalar qyzmetindegi baspasóz máslıhatynda.

Vıtse-mınıstrdiń atap ótýinshe, jer paıdalanýshylardy ekonomıkalyq májbúrleýge jaǵdaı jasaý úshin paıdalanylmaıtyn aýyl sharýashylyǵy jerlerine salyq stavkasy 10 eseden 20 esege ulǵaıtyldy.

«Joǵaryda atalǵan sharalardy eskere otyryp, bıyl 5 mln gektar paıdalanylmaıtyn aýyl sharýashylyǵy jerin memleketke qaıtarýdy josparlap otyrmyz. Bul rette paıdalanylmaıtyn jáne zańnamany buzyp berilgen jerlerdi alyp qoıý - bir kúnniń jumysy emestigin atap ótemin. Óıtkeni Konstıtýtsııanyń jáne Azamattyq kodekstiń normalaryna sáıkes menshik quqyǵy qorǵalǵan. Al alyp qoıý protsesi tek sot arqyly júzege asady», - dedi ol.