Jerdi qalpyna keltirý jumysy qalaı júrgiziledi
ASTANA. QazAqparat - Búginde respýblıka boıynsha 187 mln gektar jaıylym jer bar. Sonyń shamamen 30-40 paıyzy shólge aınalyp ketýi ábden múmkin.
Osyǵan baılanysty jaıylymdardy qaıta qalpyna keltirý sharalaryn atqarǵan jón. Al, eń bastysy, aýyldyq jerlerde xalyqtyń jaıylymdy qalpyna keltirýge degen yntasyn, ekologııalyq mádenıetin qalyptastyrǵan mańyzdy. BUU Damý baǵdarlamasynyń bıoalýandylyqty saqtaý jónindegi jobalardyń menedjeri Talǵat Kerteshev osyndaı pikir bildirdi, dep xabarlaıdy QazAqparat tilshisi.
"Mysaly, shóldi aımaqta bir qudyq bolsa, ol jerge mal jıi kelip, sý ishedi. Mine, sol qudyqtyń aınalasynda 3 shaqyrymǵa deıingi jer degradatsııaǵa ushyraıdy. Al osy jerdi qalaı qalpyna keltiremiz? Jaıylymdy aýystyrý bar, shópterdi egý, sosyn aǵash otyrǵyzý jáne taǵy basqa sharalardy atqarý qajet. Biz arnaıy pılottyq jobalardy qolǵa alyp, naqty qandaı nátıjege jetýge bolatynyn kórsetip jatyrmyz. Bizdiń tájirıbemizdi jergilikti ákimdikter, aýyl sharýashylyǵy mınıstrligi ary qaraı jalǵastyryp áketýi kerek", - deıdi Talǵat Kerteshev.
Onyń aıtýynsha, bir qudyqtyń aınalasyn qalpyna keltirý úshin 30-60 myń AQSh dollary ketedi. "Onyń ishine ne kiredi? Sharýa qojalyqtarynyń salatyn úı-jaıy, kún men jel qondyrǵylary jáne taǵysyn taǵy. Biz granttyq aqshaǵa qudyqtyń ózin qalpyna keltirip, aǵash pen shópterdi otyrǵyzyp beremiz. Sosyn sol jer qalaı ózgerdi, ony tóńirekte otyrǵan sharýa qojalyqtaryna kórsetýimiz kerek".
