Jerdi eshkim arqalap áketpeıdi - QR Prezıdenti
ASTANA. QazAqparat - Otandyq buqaralyq aqparat quraldaryna suxbat bergen Memleket basshysy Nursultan Nazarbaev jerdi óz azamattarymyzǵa jeke menshikke berýdiń qajettiligi jaıynda aıtyp berdi, dep xabarlaıdy QazAqparat tilshisi.
«Qazaqtyń jerine jany ashıtyn eki qazaq bolsa, ekeýiniń biri men shyǵarmyn. Sebebi shekaramyzdy shegelegen kezde 14 myń shaqyrymnyń ár metri úshin kúrestik. Eshkimge eshteńeni bermeý úshin, bersek, dál sondaıdy alý úshin... Sondyqtan jerdi eshkim arqalap áketpeıdi. Men bilemin ol qorqynysh-úreıdiń qaıdan shyǵyp jatqanyn. «Kórshiler jerdi alyp ketpeı me, óıtpeı me, búıtpeı me» deıdi. Jerdi mashınaǵa, ıa bolmasa, vagonǵa tıep, eshkim alyp ketpeıdi. Bul - Qazaqstannyń jeri. Qazaqstannnyń zańdary da bar. Oǵan sáıkes, basqa adamdarǵa jerdi satýǵa ruqsat joq. Sondyqtan qazir óz azamattarymyzǵa jekemenshik quqyǵyn bersek, alaıda sonyń ózin alatyndar joq bolyp tur ǵoı, áli de bıznes qatty qulshynys tanytyp jatqan joq», - deıdi Prezıdent.
Memleket basshysynyń aıtýynsha, Batys elderinde aýyl sharýashylyǵy salasynda jerge jekemenshik quqyǵy keńinen taraǵan. Sebebi óz kásibin damytamyn deıtin ınvestor aldymen jeke menshigi úshin alańdaıdy, ol menshiktiń memleket tarapynan qorǵalýyn talap etedi.
Aıta keteıik, Nursultan Nazarbaev búgin jer salasyndaǵy reformanyń tıimdiligin qarapaıym mysalmen túsindirip berdi.
