Jerdi durys paıdalanbaı otyrǵandardyń reestri túziledi - Q. Otarov
ASTANA. 28 aqpan. QazAqparat - Jer ýchaskelerin durys paıdalanbaı otyrǵandardyń, sondaı-aq josyqsyz jer ıelenýshilerdiń reestri túziledi. Bul týraly búgin Májiliste «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.
Qujatty tanystyrǵan Óńirlik damý mınıstrligi Jer resýrstaryn basqarý komıtetiniń tóraǵasy Qadyrhan Otarovtyń aıtýynsha, atalǵan norma jer ýchaskesin paıdalaný týraly erejeni buzǵan tulǵalarǵa úsh jyl boıyna jerdi qaıtara bermeýge ákep soqtyrady. «Óz kezeginde alynǵan jerler qaıta aınalymǵa ońaı túsip, jerdi durys paıdalanatyndarǵa usynylatyn bolady. Óıtkeni, jerdi paıdalaný zańnamasyn buzýshylar reestriniń tiziminde belgili bir ýaqyt boıynsha turady. Jalpy bundaı málimetter bazasyn qurý jáne júrgizý memlekettik satyp alýlardy durys atqarmaıtyndardyń tizilimine uqsas etip júrgizilýi múmkin», - dedi Q. Otarov. Onyń paıymynsha, bundaı reestr aýmaqtyq jer ınspektsııalarymen avtomattandyrylǵan aqparattyq málimetter bazasy arqyly júrgiziledi.
