Jerdi bos jatqyzbaı, halyq ıgiligine jaratý qajet - Imanǵalı Shónkenov

KÓKShETAÝ. QazAqparat - Jerdi bos jatqyzbaı, ony halyq ıgiligine jaratý qajet. Aqmola oblysyndaǵy «Agrofırma Green Star» jaýapkershiligi shekteýli seriktestiginiń dırektory Imanǵalı Shónkenov Ulttyq keńestiń ekinshi otyrysyndaǵy Memleket basshysynyń tapsyrmalaryna qatysty osyndaı pikir bildirdi, dep habarlaıdy QazAqparat tilshisi.

Imanǵalı Shónkenovtyń aıtýynsha, Memleket basshysy Ulttyq keńeste sóılegen sózinde jerdi tıimdi paıdalanýdyń jańa múmkindikteri týraly aıtyp qana qoımaı, eń aldymen naqty mindetterdi aıqyndap berdi.

«Memleket basshysy óz sózinde: «Kókeıtesti máseleniń biri – Jer jáne ony tıimdi paıdalanýǵa qatysty. Jaqynda Aqmola oblysyna jasaǵan saparymda aýyl sharýashylyǵy maqsatyndaǵy jerdi tıimsiz paıdalaný jaıyna nazar aýdardym. Bul baǵytta, meniń ustanymym – bekem: Jerdi ıgere alatyn adam ǵana onyń ıesi bolýǵa laıyq»,-dep atap ótti. Rasynda da, búgingi kúni jer máselesi kez kelgen qazaqstandyqty tolǵandyrady. Prezıdenttiń jerdi tıimdi paıdalaný týraly mindetteri meniń oıymsha, óte mańyzdy. Jalpy, jerdi bos jatqyzbaı, ony halyq ıgiligine jaratý qajet. Jerdi tıimdi paıdalaný arqyly organıkalyq jáne ekologııalyq taza ónim óndirýdiń áleýetin iske asyrýǵa bolady. Bul Aqmola oblysy úshin óte mańyzdy, óıtkeni, bizdiń qasymyzda Nur-Sultan megapolısi bar jáne elordaǵa jetkizilim kólemin ulǵaıtý mindeti tur», - deıdi I.Shónkenov.

Osy rette, ol Memleket basshysy Úkimetke tıisti quqyqtyq aktilerdi jedel qabyldap, ıgerilmeı, bos jatqan jerlerdi ekonomıkalyq aınalymǵa engizý sharalaryn qolǵa alýy týraly tapsyrmasynyń aýyl sharýashylyǵy salasynyń damýyna serpin beretinine toqtaldy.

«Aýyl sharýashylyǵy taýarlaryn óndirýshi retinde eksportqa baǵyttalyp, ónim kólemin ulǵaıtý baǵytynda jumys isteıtin bolamyz. Bizdiń qoldan sýarýdy damytýda áleýetimiz zor. Prezıdenttiń tapsyrmasyna sáıkes, 2030 jylǵa deıin ylǵaldandyrý arqyly sýarylatyn egistiktiń kólemin respýblıka boıynsha 3 mıllıon gektarǵa deıin jetkizý josparda bar. Bul mal sharýashylyǵy men ósimdik sharýashylyǵyn qarqyndy damytýǵa múmkindik bermekshi.

Bizdiń kompanııaǵa Tselınograd aýdanynyń Qabanbaı batyr selolyq okrýgi aýmaǵynda ornalasqan «Agrofırma Green Star» men «Agro park» seriktestikteri kiredi. «Agrofırma Green Star» seriktestigi jyl saıyn 1200 gektar jerge agrotehnıkalyq jumystaryn júrgizip, Nur-Sultan qalasyn sapaly tabıǵı kókónispen qamtamasyz etip keledi.

Sózimniń sońynda aıtarym, Memleket basshysynyń Ulttyq keńeste jerdi ratsıonaldy paıdalanýdy baqylaýdy qataıtý, paıdalanylmaı jatqan jerlerge salynatyń salyqtyń kólemin ulǵaıtý mańyzdy qadam deý kerek. Óıtkeni aýyl sharýashylyǵy salasynyń damýy men elimizdiń áleýmettik-ekonomıkalyq órkendeýi osyǵan tikeleı baılanysty», - dep túıindedi I.Shónkenov.