Jerdi alyp, ony ózgege jalǵa berýdi toqtatý qajet – Saıran Buqanov

QOSTANAI. QazAqparat – Jerdi alyp, ony ózge bir tanysyna jalǵa berip qoıýdy toqtatý qajet. Mundaı pikirdi Qazaqstannyń Eńbek eri, jer reformasy boıynsha respýblıkalyq komıssııannyń múshesi Saıran Buqanov bildirdi, dep habarlaıdy QazAqparat tilshisi.

«Prezıdent usynǵan jer reformasy jónindegi zań jobasyn tolyq qoldaımyn. Ata-babalarymyz qan-maıdanda júrip, osy jerdi bizge aman etip qaldyrdy. Al Elbasy N.Á.Nazarbaev shekaramyzdy shegendedi. Endi osy jerimizdi durys paıdalanýymyz kerek. Qazir azamattar jerdi alady, biraq ony tıimdi paıdalanbaıdy. Barlyǵyn birdeı jazǵyrýǵa bolmaıdy. Keıbireýlerdiń alqaptary durys ónim bermeı jatady. Ony da eskergen mańyzdy. Osynyń barlyǵyn saraptaı kele, respýblıkalyq jer reformasy jónindegi komıssııa músheleri jerdiń durys ıgerilýin baqylaıtyn agenttik qurý qajet dep esepteıdi. Ol tikeleı Memleket basshysyna baǵynýy qajet. Agenttik jerdi paıdalanýdy qadaǵalap, olqylyqtar tapsa, onda ony memleketke qaıtarýy tıis bolady. Qazir jerdi ákimder beredi jáne ózderi baqylaýda ustaıdy. Jerdi alǵan azamat alqabyn durys ıgere almasa, onda ony qaıtaryp alý protsesi búginde óte kúrdeli.

Osy oraıda taǵy bir ózekti máselege toqtalsam. Jer alyp, ony ózge bir tanysyna jalǵa berip qoıatyndarǵa shek qoıý qajet. ıAǵnı, qosalqy jaldamamen aınalysý. Bul kóleńkeli bıznestiń bir túri. Osy árekettiń jolyn kesip, jerdi tıimdi ári ońtaıly paıdalanatyn adamdarǵa bergenimiz jón», - dep atap ótti Saıran Balkenuly.

Eske sala keteıik, bıyl naýryz aıynda Prezıdent Qasym-Jomart Toqaev jerdi sheteldikterge satýǵa birjola tyıym salýdy kózdeıtin zań jobasyn Májiliske joldaǵan bolatyn.

Al búgin 7 sáýir kúni Parlament Májilisiniń jalpy otyrysynda usynylǵan zań jobasy birinshi oqylymda maquldandy.