Jerdi aldaǵy 30 jylda qatty sýyq jaılaıdy
ASTANA. QazAqparat - Endi birneshe jyldan keıin Jer betine salqyn aýa raıynyń tsıkly kelip, ol planetany 30 jyl ýaqyt shamasynda sýyqtyń qushaǵynda ustap turady. Reseı ǵylym akademııasyna qarasty Túmen ǵylymı ortalyǵynyń tóraǵasy Vladımır Melnıkov osyndaı tujyrym jasap otyr, dep jazady «Egemen Qazaqstan» gazeti.
Ǵalymnyń paıymynsha, bul jyldarda aýanyń ortasha temperatýrasy 1,5-2 gradýsqa deıin tómendeıdi. Ol, sonymen qatar, aýa raıynyń sýytýy turǵyndardyń densaýlyq jaǵdaılaryna keri áser etpeıtinin, muny jan-janýarlardyń da jaqsy kótere alatynyn aıtyp, jurtty bekerge alańdamaýǵa shaqyrady.
Melnıkov erte zamandarda kún qabaǵynyń bulaısha kúrt sýytýynyń talaı ret orasan zor apatqa alyp barǵanyn, sebebi, ol kezde adamdardyń sýyqtan qorǵana alatyn qabiletteri men jaǵdaılary bolmaǵanyn atap ótedi. «Ertedegi dáýirlerde mundaı sýyqtardan jan-janýarlar túr-túrimen qyrylyp ketken. Alaıda, ol kezderi aýanyń tómendeýi tutas bir terrıtorııalardy qamtyp, tsıklder barynsha uzaqqa sozylyp turǵan. Al bul joly ol tap mundaı aýqymdy ýaqyt aralyǵyn almaıdy», - deıdi ol.
