Jerde toń qalyń: Aqtóbege Mańǵystaý men Qyzylordadan kómek jiberilýi múmkin
AQTÓBE. KAZINFORM – Bıyl Aqtóbede byltyrǵyǵa qaraǵanda toń shamamen 2 ese qalyń. Oblys ákimdigi qaýip tónse Mańǵystaý men Qyzylordadan kómek kelýi múmkin ekenin habarlady.
Aqtóbe oblysy ákimdiginde tótenshe jaǵdaılardyń aldyn alý jáne joıý jónindegi oblystyq shtabtyń kezekten tys otyrys ótti. Onda kóktemgi tasqynǵa daıyndyq jaıy pysyqtaldy. Aqtóbe oblystyq TJD bastyǵynyń orynbasary Aıbat Jańabergenovtiń aıtýynsha, byltyr topyraqtyń betki qabaty qatyp, toń qalyń bolyp, qar aralas jaýyn-shashynnyń saldarynan tasqynnyń zardaby tıdi.
- Qazgıdromettiń málimetine sáıkes Aqtóbe qalasy, sondaı-aq Muǵaljar, Áıteke bı, Qarǵaly, Mártók, Qobda aýdandarynda topyraqtyń qatý deńgeıi 2024 jylǵy kórsetkishten 1,5-2 ese asady. Bul 2025 jyly sý tasqyny qaýpiniń joǵary ekendigin kórsetedi. Jeke quramnan 2 454 adam, 866 tehnıka, 441 motosorǵy, 102 júzý quraly, 638 sý ótkizbeıtin kombınezon, 82 shatyr, 2 dalalyq as úı jáne 157 generator daıyndaldy. Sondaı-aq, jalpy syıymdylyǵy 34 990 adamǵa arnalǵan 199 ýaqytsha ornalastyrý pýnkti ázirlendi. Qajet bolǵan jaǵdaıda qosymsha Qyzylorda (30 adam, 6 birlik tehnıka) jáne Mańǵystaý oblystarynan (45 adam, 5 birlik tehnıka) TJM kúshteri men quraldary tartylady, - dep habarlady oblys ákiminiń baspasóz qyzmeti.
Aqtóbe qalasynda 80 saıajaı ujymynda qaýip bar. Olar úshin 16 ýaqytsha ornalastyrý pýnkti daıyndalady. Qaladaǵy Peschanka ózeniniń jaǵalaýyn nyǵaıtý jumystary jalǵasyp jatyr. Sonymen birge Aqtóbe qalasy, Alǵa, Áıteke bı, Baıǵanın, Yrǵyz, Muǵaljar, Oıyl, Qobda jáne Hromtaý aýdandarynda muz jarý jumystaryn júrgizetin 22 oryn anyqtalǵan. Qorǵanys bógetteri men sý burý arnalaryn salǵan merdigerler endi kezekshilikke shyǵady.
- Bıyl sý basý qaýpi burynǵyǵa qaraǵanda aıtarlyqtaı joǵary ekenin kórip otyrmyz. Sondyqtan barlyq jaýapty organ jedel jáne úılesimdi áreket etýi kerek. Qalalar men aýdandar ákimderinen aryqtardy, kanaldardy, bógetterdi jáne sý ótkizý qurylystaryn tazartý jumystaryn 10 naýryzǵa deıin aıaqtaýdy tapsyramyn. Baý-baqsha ujymdaryndaǵy jáne qaýipti aımaqtaǵy eldi mekenderdegi qorǵanys qurylystaryna erekshe nazar aýdarylsyn. Ákimdikter azyq-túlik, dári-dármek jáne jyly zattardy qosa alǵanda, barlyq qajetti zattarmen ýaqytsha ornalastyrý pýnktterin qamtamasyz etýi tıis. Eger bir jerde jumys tıisinshe oryndalmasa, biz ákimshilik tıisti sharalar qoldanamyz. Sý tasqyny kezeńi barynsha jaýapkershilikti talap etedi sondyqtan árkim óz jumysynyń mańyzdylyǵyn túsinýi tıis, - dedi jıynda Aqtóbe oblysynyń ákimi Ashat Shaharov.
Eske salsaq, Aqtóbede sý basý qaýpi basyn 58 eldi meken bar. Qazirgi kezde aýdan ákimderi, qaıyq, doron, qum toltyrýǵa arnalǵan qap satyp alyp jatyr.