Jerde eki adamnyń jatqanyn, qan men gılzany kórdim: Sherzattyń sotynda kýágerler jaýap berip jatyr

TALDYQORǴAN. KAZINFORM — Taldyqorǵanda marqum Sherzat Polattyń isi boıynsha sot otyrysynda kýágerler jaýap berip jatyr. 

Taǵy bir kýáger — Arlan Qusaıynov.

Onyń aıtýynsha, sol túni ol ákimdik ǵımaratynyń janynda júrgen. Sol sátte onyń dosy Danııarǵa anasy qońyraý shalyp, atys bolǵanyn aıtyp, dereý úıge qaıtýyn eskertken. Soǵan qaramastan, olar úsh kólikpen oqıǵa ornyna barýǵa sheshim qabyldaıdy. Arlan tóbeleske qatysqandardyń eshqaısysyn tanymaıtynyn jetkizdi.

— Biz kólikterge minip, avtobazaǵa qaraı júrdik. Men sońǵy bolyp keldim. Maǵan dosym qońyraý shalyp, sóılestik, sodan soń men oqıǵa ornyna jaqyndadym. Ol jerde adamdar taraı bastapty, kóp adam joq edi. Eshqandaı kúdikti nárse baıqamadym, aıǵaqtarǵa da mán bermedim. Keıin Daýlet Muhamedııarovpen birge dosymyz Emıl Mamedovtyń jumys ornyna bardyq, ol kóshe boıymen joǵary ornalasqan, — dedi Arlan.

Biraz ýaqyttan keıin olar qaıtadan oqıǵa ornyna oralǵan. Sol jerde beıtanys bir áıel bolǵan. Ol bireýdiń qaıtys bolǵanyn aıtqan.

Sodan keıin Arlan ketip qalǵan. Sottaǵy suraqtarǵa jaýap bere otyryp, ol sol túnnen keıin dostarymen habarlaspaǵanyn jetkizdi, sebebi olarmen jaqyn aralaspaıdy.

Taǵy bir kýáger — Danııar Janbolatuly. Ol da jábirlenýshilerdi de, aıyptalýshylardy da tanymaıdy.

Qazannyń 3-nen 4-ine qaraǵan túnde ol jattyǵýdan keıin dostarymen ákimdik mańynda júrgen. Bir ýaqytta anasy habarlasyp, qaıda júrgenin suraǵan. Sodan keıin bári birge dúkenge barǵan.

— Men oqıǵa ornyna Arlan Qusaıynovpen birge keldim. Barǵan kezde ol jerde jaraqat alǵan jigitter boldy, shamasy olar Sherzattyń dostary bolsa kerek. Bireýiniń basy qan boldy, al qalǵandary qorqyp, abyrjyp turdy. Biz ne bolǵanyn naqty túsinbedik, jaı tóbeles shyǵar dep oıladyq. Biraz turǵan soń ıÝldash pen Arlan bir jaqqa ketip qaldy. Qaıda jáne ne úshin ketkenderin men bilmeımin, — dedi Danııar sotta.

Úshinshi kýáger Dáýlet Muhamedııarulynyń aıtýynsha, oqıǵa orynyna barǵan kezde jerde jatqan eki adamdy kórgen.

— Men jerde jatqan eki adamdy, qan jáne gılza kórdim. Olar qozǵalmaı jatty. Artynsha er adam jerde jatqandardyń bireýin kóterip, mashınaǵa saldy. Ekinshisi esimde joq. Sodan keıin shamamen bes mınýttan soń polıtseıler keldi, — dep jaýap berdi kýáger.

Aıta keteıik, aıyptalýshylar oryndyǵynda toǵyz adam bar, olardyń biri kámeletke tolmaǵan.

Buryn sotta Sherzattyń aǵasy Nurqanat Ǵaıypbaevtyń tergeý kezindegi beınejazbasy kórsetildi. 

Sonymen qatar oqıǵa ornyna alǵash barǵan polıtseıler kýálik berdi. 

Oǵan deıin sot otyrysynda kýáger Elmıra Nurbekova jaýap berdi. 

Ekinshi kýáger qyz Dana Jaqsygeldi oqıǵa týraly baıandady.

Sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi. 

Eske salaıyq, prokýror oqıǵanyń tolyq hronologııasyn baıandady. 

Aıyptalýshylardyń kópshiligi kináni moıyndaǵan joq. 

Byltyr 4 qazan kúni tóbelesten 16 jastaǵy jasóspirim qaıtys bolǵanyn jazǵan edik. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

2024 jyldyń jeltoqsan aıynda Talǵar mańynda Sherzat Polattyń aǵasynyń denesi tabyldy.