Jerde 8 tamyzda eń kúshti magnıttik daýyl bolýy múmkin

ASTANA. KAZINFORM — Jerdi sońǵy 2 aıdaǵy eń kúshti magnıttik daýyl kútip tur. Ol 8 tamyz, juma kúni bastalady, dep habarlaıdy mir24.ru.

Budan buryn belgili bolǵandaı, 5 tamyzda Kúnde eń sońǵy qýat deńgeıi M4.4 bolǵan jarqyl oryn alǵan. Bul kezde plazmalyq emıssııa paıda boldy, biraq bult bizdiń planetaǵa emes, shamamen 45 gradýs buryshqa baǵyttalǵan. Ǵalymdar bul oqıǵa bizdiń planetamyzǵa qaýip tóndirmeıdi degen qorytyndyǵa keldi.

Degenmen, jańartylǵan málimetterge sáıkes, Jer úshin geomagnıttik saldar kútkennen áldeqaıda kúshti bolady.

Osylaısha, Jerdi joǵary jyldamdyqty bult ózegi soǵady. Bul magnıt órisine qatty áser etedi.
Plazma bizdiń planetamyzǵa Máskeý ýaqytymen tańǵy saǵat 7-de (Astana ýaqytymen saǵat 9-da) jetedi.

Boljamdarǵa sáıkes, geomagnıttik kórsetkish Kr (geomagnıttik belsendilikti sıpattaıtyn kórsetkish) 6-ǵa deıin kóteriledi.Mundaı jaǵdaı 13 maýsymnan beri baıqalǵan joq.

Mundaı masshtabtaǵy oqıǵalar ortasha qýat bolyp sanalady. Biraq olar energetıkalyq júıelerge, ǵarysh apparattarynyń jumysyna jáne radıotolqyndardyń taralýyna áser etýi múmkin. Mundaı daýyl kezinde polıarlyq jaryq 60 - 50 gradýs endikke deıin kórinedi.

Geomagnıttik jaǵdaı jumaǵa qaraǵan túni, Jer úlken tájdik tesik aımaǵyna engen kezde nasharlaıdy. Jalpy, Kúndegi jaǵdaı qıyn dep baǵalanady – 6 tamyzda bir kúnde 18 jarqyl boldy, dep habarlaıdy Ǵaryshtyq zertteýler ınstıtýtynyń Kún astronomııasy zerthanasy men Reseı ǵylym akademııasynyń Kún-jer fızıkasy ınstıtýty.

Eske sala keteıik, maýsym aıyndaǵy geomagnıttik belsendilik jaıly jazǵan edik.