«Jerdi jalǵyz ózi qazatyn»: Sultan Sarsemalıevtiń sotynda 18 adam kýálik etti

Kezekti otyrysta josparlanǵan 26 kýániń 18-i bir kúnde sot zalyna kelip, bar bilgenderin aıtty.

Kúdikti 2024 jyly kásipkerlik nysandardyń birine jaldamaly jumysshy bolyp, jer qazyp, qoqys shyǵarǵan. Sultan men jumys bergen kásipker bir yqshamaýdanda turǵan. Ara tura bir-birin kórgennen keıin aǵa-ini bolyp aralasqan.

— Qara jumysqa ıkemdi, qoly mashyqtanǵan, jerdi jalǵyz ózi qazatyn qaıratty azamat ekenin kórdim. Jumys barysynda kelispeýshilik bolǵan joq. Artyq sóılemeıdi. 2025 jyldyń mamyrynda 250 myń teńgeni bólip-bólip surady. Men Meıramgúl Qarabalınanyń nómirine jiberdim. 3 kúnnen keıin qaıtaratynyn aıtty. Ýaqytynda jiberdi, — dep pikir bildirdi kásipker.

Kýá dep tanylǵan azamattardyń arasynda Sultan Sarsemalıevtiń ata-anasy, baýyrlary bar. Kúdiktiniń bir aǵasymen jáne apasymen jaqyn qarym-qatynasta aralaspaıtyny belgili boldy. Ol ápkesi Aıdana Sarsemalıevamen syrlasyp, jıi baılanysyp turǵan. Aıyptalýshynyń baýyry suraqtarǵa jaýap berý kezinde Sultan men Aqbaıannyń zańdy túrde ajyrasýyna inisiniń basqa adammen kóńil qosqanyn dáleldeıtin naqty sýretti kórmegenin aıtty. Jáne Aqbaıan aýyrǵan kezde inisiniń áıeline barynsha qarasqanyn, únemi janynda bolyp, densaýlyǵynyń ońalyp ketýine baryn salǵanyn málimdedi.

— Tamyzda kórgen kezde Sultan maǵan qatty sharshaǵanyn aıtty. «Aqbaıan esin jııar emes, shaqalaq balammen anam da qınalyp ketti. Buǵan qosa ózge de balalarym da bar», dedi inim. Men oǵan shydamdylyq tanytýdy, «balalaryńdy ósiremin, áıelińdi aýrýdan aıyqtyramyn dep júrsiń, narsyń, shydaısyń dep, qoldaý bildirdim», — dedi kúdiktiniń ápkesi.

Aıdana Sarsemalıeva Aqbaıan Muqanǵalıevanyń densaýlyq jaǵdaıyn rastap, múgedektik alý úshin 3 aı boıy túrli mekemeniń tabaldyryǵyn tozdyrǵanyn aıtty.

— Anam Aqbaıan balalardy soǵyp jatyr dedi. Kóterilip ketetini bar. Sýyq tıdi. Basyna jara shyqty. Shashyn aldyq. Sóıtip júrgende anam Sultanǵa «Aqbaıandy jaǵdaı jasalǵan jerge aparyp, bapta» dep,  bes balany ózi qaraıtynyn aıtty. Osydan keıin Sultan men Aqbaıan qalada turdy, — dep mán-jaıǵa toqtaldy Aıdana Sarsemalıeva.

Osydan soń Aıdana Sarsemalıeva inisine Aqbaıanǵa zań boıynsha qamqorshy bolý kerektigin aıtady. Kúdikti bul istiń basy-qasynda júre almaıtynyn jetkizip, Sultannyń atynan sot protsesterine qatysý úshin senimhat bergen.

Kýá sýdıa qoıǵan suraqtarǵa jaýap berý kezinde Násip Óteshqalıevanyń Aqbaıan syrqattanyp, aýrýhanada jatqan kezde kelmegenin aıtty. Sýdıa Zarema Hamıdýllına másele eki taraptyń syrttaı bir-birin kinálap otyrǵanyn tilge tıek etti. Aıdana Sarsemalıevanyń pikirinshe, Sultan men Aqbaıan materıaldyq emes, moraldy qoldaýǵa zárý bolǵan.

— Sultannyń bar maqsaty Aqbaıandy emdetý boldy. Tek otbasym dep júgirip júrdi. Balalardy ózi qarap, tipti Aqbaıandy jýyndyryp, bar jumysty istedi. Bar tabysy — kishkentaılarynyń járdemaqysy. Aqbaıan aýyrǵan sátten bastap Sultan jumys istemedi, áıelin aýrýhanaǵa aparyp, qaratýmen boldy, — dep tolyqtyrdy Aıdana Sarsemalıeva.

Ol Sultandy sońǵy márte ótken jyldyń 30 qarasha kúni kórgen. Sol kúni inisinen oǵash qylyq baıqamapty.

Sot otyrysynda kýágelerdiń birqatary Naýryz ben Meıramgúldiń qandaı adam bolǵandaryn aıtty. Barlyǵynyń pikiri toǵysyp, otbasynyń jýas, artyq qylyqtary joq dep málimdedi. Olardyń sózinshe, Meıramgúldiń oılaý qabileti jasyna saı emes bolǵan. Ózin bala sııaqty ustapty.Degenmen qurdastarymen jaqsy-qarym qatynasta bolyp, basqosýlardan qalmaýǵa tyrysqan.

Kýálardyń arasynda Naýryz qaıtys bolǵannan keıin onyń telefony arqyly jazbasha sóılesip, qoradaǵy sıyr men qoıdy satyp alǵan azamattar da boldy. Barlyǵy Naýryzben tek jazbasha habarlama arqyly baılanysqan. Telefon soqqan kezde ol jaýap bermegen.

Sotta sóz alǵan jábirlenýshi taraptan kýá Shalqar Muqanǵalıev marqumdar Sultan men Aqbaıanǵa qoldan kelgenshe qoldaý kórsetkenin aıtty.

— Sultan sotta ata-enesi araǵa túsip, bizdi ajyratpaq boldy, bala-shaǵamdy alyp ketip, bopsalaǵylary keldi dedi. Bul sózimen kelispeımin. Shyndyǵynda olar shamalary kelgenshe qyz-kúıeýine, jıenderine járdemdeskisi keldi. Biraq olardyń kómektesýine Sultannyń ózi múmkindik bergen joq. Sebebi, Naýryzǵa Násip apamyz Sultan qyzym men jıenderime kezdesýge múmkindik bermeı jatyr degen.Tipti jasaǵan tamaǵyn tógip tastaıtynyn aıtqan, — dedi Shalqar Muqanǵalıev.

Sot 2 maýsym kúni jalǵasady. Qalǵan 7 kýáni sol kúni tyńdaý josparlanyp otyr.

Buǵan deıin negizgi sot otyrysynda aıyptalýshy Sultan Sársemalıev sotta qaıynaǵasy Naýryz Muqanǵalıevti qasaqana emes, ózin-ózi qorǵaý maqsatynda óltirgenin málimdedi.

Qylmystyq iske Atyraý oblysynyń qylmystyq ister jónindegi mamandandyrylǵan aýdanaralyq sotynyń sýdıasy Zarema Hamıdýllına tórelik etip otyr.

18 mamyr kúni aldyn ala sot otyrysy ótti.

Sol kezde Sultan Sarsemalıev isti alqa bılerge berýden bas tartty.

Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty.

Tergeý barysynda Sultan Sarsemalıev Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan.

Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Al. Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy.

Buǵan deıin marqumdardyń qyzy men baýyry esepteletin Aqbaıan Muqaǵalıevanyń adam óltirý faktisine qatysy joq ekeni belgili boldy.

Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.

6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.

Keıin olardyń denesinde pyshaq izderi bary belgili boldy.

9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.

Sondaı aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.

Aqpan aıynyń basynda kúdiktiń 5 balasy memleket qamqorlyǵyna alyndy.

Aqpan aıynyń sońynda kúdikti men marqumdardyń jaqyny esepteletin Aqbaıan Muqanǵalıeva Indonezııada ustaldy.

Eki kúdiktiniń shetelde qalaı ustalǵany jóninde vıdeo jarııalandy.

Birneshe kúnnen keıin olar Atyraý qalasyna jetkizildi.

Keıin polıtsııa Atyraý oblysy Jangeldın aýylynda bútin bir otbasyny óltirdi degen kúdikke ilingen Sultan Sarsemalıevti ata-enesin óltirgen úıge apardy. Ol tergeýshilerge qylmysty qalaı jasaǵanyn kórsetip, suraqtarǵa jaýap bergen.

Іshki ister mınıstrligi jarııalaǵan vıdeodan Sultan Sarsemalıevtiń qalada jaldap turǵan úıiniń irgesinen qazǵan shuńqyrdy kórsetkenin baıqaýǵa bolady.

Ol sot sanktsııasymen 2 aıǵa qamaýǵa alynǵan edi.

Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni belgili boldy.