Jerdi kenetten G2 deńgeıindegi magnıttik daýyl basty
ASTANA. KAZINFORM – Jerde kútpegen jerden G2 deńgeıindegi planetalyq magnıttik daýyl bastaldy. Geomagnıttik aýytqýlarǵa Kúndegi tájdik tesik áser etken. Bul týraly Reseı Ǵylym akademııasy Ǵaryshtyq zertteýler ınstıtýtynyń Kún astronomııasy zerthanasy málimdedi.
– Kútpegen jaǵdaı boldy deýge bolady... Bir saǵatqa jeter-jetpes ýaqyt buryn G2 deńgeıindegi planetalyq magnıttik daýyl bastaldy, – delingen zerthananyń Telegram arnasyndaǵy habarlamada.
Buǵan deıin mamandar Kúndegi tájdik tesikten taraǵan kún jeliniń aǵyny geomagnıttik aýytqýlar týǵyzady dep boljaǵanymen, magnıttik daýyl deńgeıine jetpeıdi dep eseptegen. Alaıda Jerdiń magnıt órisindegi belsendilik kúrt kúsheıgen.
G2 deńgeıi bes satyly shkala boıynsha ortasha kúshti magnıttik daýylǵa sáıkes keledi. Onyń sebebi – Kún tájindegi tájdik tesik. Bul – ǵaryshqa jyldamdyǵy joǵary kún jeli taralatyn aımaq. Kún jeli Jerge jetkende magnıtosferamen árekettesip, geomagnıttik aýytqýlar týdyrýy múmkin.
Daýyl bastalǵannan keıin polıarlyq shuǵyla baıqala bastaǵan. Zerthana málimetinshe, Reseı aýmaǵynda onyń eń joǵary qarqyndylyǵy tirkelgen.
Ǵalymdardyń baǵalaýynsha, tájdik tesik aldaǵy 2-3 kúnde ǵaryshtyq aýa raıyna áser etedi. Alaıda G2 deńgeıindegi magnıttik daýyl osy kezeń boıy úzdiksiz saqtalmaýy múmkin. Geomagnıttik belsendilik kún jeliniń sıpattamalaryna qaraı ózgerip otyrady.
Kúndegi tájdik tesikterdiń áserinen bolǵan magnıttik daýyldar bıyl jazda da tirkelgen. Shildede geomagnıttik belsendilik G1 deńgeıine jetse, qazanda Jerdi odan da kúshti G3 deńgeıindegi daýyl basyp, jarqyn polıarlyq shuǵylalar baıqalǵan.
Aıta keteıik, magnıttik daýyldardyń adam densaýlyǵyna áseri jóninde ǵalymdar arasynda ortaq pikir joq. Degenmen medıtsına mundaı qubylystar qan qysymynyń kóterilýine, bas aýrýyna, jumys qabiletiniń tómendeýine, mazasyzdyqqa jáne allergııany qosa alǵanda, sozylmaly aýrýlardyń asqynýyna áser etýi múmkin ekeni joqqa shyǵarmaıdy.
Eske sala ketsek, 28 qazanda aldaǵy kúnderi Jerde magnıttik daýyl bolýy múmkin ekenin habarlap edik.
