Jerasty ulttyq baılyǵymyzdy eń birinshi memlekettik kompanııalarǵa berý qajet – Oljas Bektenov
ASTANA. KAZINFORM – Elimizde taý jynystaryn taldamalyq zertteý boıynsha halyqaralyq standarttarǵa saı keletin mamandandyrylǵan akkredıttelgen zerthana qurylýy tıis. Bul týraly Úkimet otyrysynda Premer-Mınıstr Oljas Bektenov aıtty.
- Birinshi. Ónerkásip jáne Energetıka mınıstrlikteri geologııalyq barlaýǵa ınvestıtsııalar tartý, onyń ishinde «tereń» qabattar men kúrdeli ken oryndaryn ıgerý kezinde jeńildikter berý boıynsha naqty tetikter men qajetti zańnamalyq túzetýler ázirlesin. Ekinshi. Ónerkásip mınıstrligi Saýda mınıstrligimen jáne «Samuryq-Qazyna» qorymen birlesip, taý jynystaryn taldamalyq zertteý boıynsha halyqaralyq standarttarǵa saı keletin mamandandyrylǵan akkredıttelgen zerthanany qurýǵa tıis. Úshinshi. Ónerkásip jáne Energetıka mınıstrlikteri «Samuryq-Qazyna» qorymen birlesip, Ulttyq geologııalyq qyzmet bazasynda ǵylymı ekologııalyq-geologııalyq klaster qurý jumysyn júrgizsin, - dedi Oljas Bektenov.
Onyń atap ótýinshe, bastapqy kezeńde «Taý-Ken Samuryq» kompanııasynyń qoldanystaǵy tehnologııalyq múmkindikterin paıdalaný kerek. Jalpy, «Taý-Ken Samuryq» kompanııasyna qoldaý kórsetip, damytý qajet.
- Biz ózimizdiń jerasty ulttyq baılyǵymyzdy birinshiden memlekettik kompanııalarǵa berip, barlaý júrgizip, ony damytyp, ıgerip, sodan keıin ınvestorlar tartýymyz qajet. Sonda ǵana onyń baǵasy ósedi jáne paıdasyn memleket kóredi. Osy tetikti keńinen qoldaný kerek, – dedi ol.
Tórtinshiden, Úkimet basshysy Ónerkásip mınıstrligi Energetıka, Tsıfrlandyrý jáne Qarjy mınıstrlikterimen birlesip, jyl sońyna deıin aıryqsha mańyzy bar alańdardaǵy aerogeofızıkalyq túsirilim jumystaryn qarjylandyrý men júrgizýdiń pármendi tetigin ázirleýi tıistigine aýdardy.
- Besinshi. Ónerkásip mınıstrligi Qarjy, Tsıfrlyq damý mınıstrlikterimen jáne Ulttyq geologııalyq qyzmetpen birlesip, tarıhı derekterdi tsıfrlandyrýdy jandandyrýy qajet. Sondaı-aq, ony saqtaý boıynsha tıisti jumystardy júrgizý kerek, - dedi Oljas Bektenov.