Jerasty sýyn keshendi paıdalanýdyń tujyrymdamasy ázirlenedi
ASTANA. KAZINFORM – Qazaqstan óz aýmaǵyndaǵy 4 myńnan astam jerasty sý kózin keshendi paıdalanýǵa bet burmaq. Bul jaıynda Sý resýrstary jáne ırrıgatsııa mınıstri Nurjan Nurjigitov Úkimet otyrysynda málim etti.
– Jalpy, elde 4 myńnan astam jerasty sý kózderi barlanǵan, olardyń bekitilgen paıdalaný qory jylyna 15,7 mıllıard tekshe metr shamasynda. Alaıda qazir bekitilgen qordyń bar bolǵany 7-10 paıyzy ǵana paıdalanylýda. Jerasty sýlary jetkilikti zerttelmegen, qorlardyń edáýir bóligi barlanbaǵan kúıde qalyp otyr, - dedi ol.
Atalǵan kózderdiń naqty áleýetin aıqyndaý úshin qosymsha aýqymdy zertteýler men baǵalaý júrgizý qajet kórinedi.
– Osyǵan baılanysty, biz jerasty sýlaryn keshendi paıdalanýdyń tujyrymdamasyn ázirleýdi bastaımyz. Tujyrymdamanyń júzege asyrylýy jerasty sýlaryn ıgerýdiń tıimdiligin edáýir arttyrýǵa, halyqty jáne ekonomıka salalaryn utymdy ári turaqty sýmen qamtamasyz etýge, sondaı-aq eldiń sý qoryn saqtaý men damytýǵa yqpal etedi, - dedi mınıstr.
Aıta keteıik, búgin Úkimet otyrysynda sý únemdeý tehnologııalaryn engizý sharalaryn pysyqtady.