Jerasty sý qorlaryn zertteýge 525,8 mln teńge bólindi
ASTANA. KAZINFORM – Elimizde 2026 jyldyń sońyna deıin jerasty sýlaryn izdeý jáne baǵalaý boıynsha 38 jobany iske asyrý josparlanyp otyr. Bul jumystarǵa 525,8 mln teńge qarastyrylǵan. Bul týraly QR Sý resýrstary jáne ırrıgatsııa vıtse-mınıstri Talǵat Momyshev Ortalyq kommýnıkatsııalar qyzmetinde ótken baspasóz máslıhatynda málimdedi.
Onyń aıtýynsha, jobalar jerasty sý qorlaryn zertteý, qaıta baǵalaý jáne naqtylaýǵa baǵyttalǵan.
– 2026 jyldyń sońyna deıin jerasty sýlaryn izdeý jáne baǵalaý boıynsha 38 jobany iske asyrý josparlanǵan. Oǵan 525,8 mln teńge qarastyrylǵan. Osy jumystar aıasynda jerasty sý qorlaryn qaıta baǵalaý jáne naqtylaý úshin 28 jobalaý-smetalyq qujattama ázirlenedi. Jetisý oblysynda paıdalaný qorlaryn qaıta baǵalaý jáne rastaý boıynsha úsh jobany aıaqtaý kózdelgen, – dedi Talǵat Momyshev.
Vıtse-mınıstrdiń málimetinshe, aldaǵy úsh jylda jerasty sýlaryn izdeý jáne baǵalaý boıynsha 88 joba iske asyrylady. Onyń 15-i 2027 jylǵa, 38-i 2028 jylǵa, 35-i 2029 jylǵa josparlanǵan.
Osy jobalar aıasynda izdeý-barlaý jáne qosymsha barlaý jumystary júrgizilip, jobalaý-smetalyq qujattamalar ázirlenedi.
Aıta keteıik, buǵan deıin elimizde jerasty sýlaryn basqarýdyń jańa tujyrymdamasy qabyldanatyny habarlanǵan edi.
