Jerar Deparde akterlikten ketýi yqtımal
ASTANA. 7 qańtar. QazAqparat - Tanymal kıno jáne teatr akteri Jerar Deparde jaqyn bolashaqta sahnadan ketetinin joqqa shyǵarǵan joq.
Frantsýzdyq «Jýrnal dıý dımansh» jýrnalyna bergen suhbatynda ol akterlik mansap ózine tym aýyr tıetindigin jáne qazirgi ýaqytta tek álemniń túkpir-túkpirin aralap, túrli halyqtarmen tanysýdy jón kóretindigin jetkizdi.
«Akterlik ǵumyrymnyń basynda men sahnada ról oınap otyryp, ne aıtyp turǵanymdy bilmeıtinmin. Biraq ýaqyt óte kele men bul ónerdiń «mýzykasy men sózin» uǵatyn boldym. Sol mezetten bastap men sahnaǵa shyǵýdy súıip qaldym», - dep eske alady Deparde. «Degenmen, qazir akterlik qyzmet meni qatty qajytyp júr. Akter bolý endi meniki emes», - dep atap ótti ol.
Depardeniń bul suhbaty Parıjdiń «Antýan» teatrynda ótip jatqan «Mahabbat hattary» atty spektakldiń ótýine oraı júrgizilgen bolatyn. Onda akter tanymal aktrısa Anýk Ememen birge basty rólderdi somdaýda.
Bolashaq shyǵarmashylyǵy men ómiri jaıynda sóz qozǵaǵan J.Deparde, «tolysqan shaǵynda esh qarajatqa muqtaj emestigin» de alǵa tartty.
«Men jumys istep bolǵanmyn. Endi ne istesem de, qaıda jáne qashan júrsem de óz erkim, - dedi ártis. - Qazirgi ýaqytta men aıqyndylyqtyń belgili bir shegine jettim, endi ózime tanys emes adamdarmen, peızajdarmen tanysqym keledi. Buryn estimegen tilderdi úırenýge qushtarmyn. Men búgingi tańda sapar barysynda soqqan nemese maǵan ózderiniń otandyq kınematograftaryn damytý isine qatysýǵa múmkindik bergen árbir eldi tanyp-bilip jatyrmyn».
Bir jyl buryn Frantsııa azamattyǵynan bas tartqan J.Deparde týǵan jerine baryp turady. Onyń aıtýynsha, frantsýzdar oǵan jyly shyraı tanytyp, áli kúnge deıin mahabbattaryn jasyrmaıdy. Biraq qazir ol Ázirbaıjan, Belgııa, Qazaqstan, Reseı, Ýkraına syndy memleketterde jıi bolady. «Men ár kezde de saıahat adamy bolǵanmyn, - deıdi akter. - Men belgili bir jerge baılanyp qalǵym kelmeıdi. Frantsııaǵa jıi at basyn buramyn, alaıda tek meıman retinde. Qazir men ózimdi erkin sezinemin».
