Jer júzinde 4 dúrkin Olımpıada chempıony atanǵan alǵashqy ziltemirshi bolýdy armandaımyn - Ilıa Ilın
ASTANA. QazAqparat - Búgin Astanadaǵy Oqýshylar saraıynda Olımpıadanyń eki dúrkin chempıony, Álem chempıonatynyń tórt dúrkin jeńimpazy qazaqstandyq ziltemirshi Ilıa Ilın kishkentaı balalarmen kezdesip, óz armandarymen bólisti.
«Qazirgi kezde men ózime úlken jospar qoıyp otyrmyn. Rıo-de-Janeıro-2016 olımpıadasynda altyn alý. Onda qarsylastardan ozý úshin jeńiske jáne óz jumysyńa kóp mán berý kerek. Josparlaryńdy aıqyn kórýiń shart. Kemshilikterińdi basymdyqqa aınaldyryp otyrý qajet. Onymen qatar bilim alý, jumys, jattyǵý jáne ózge de josparlar bar. Rıo-de-Janeıroda biz barlyǵyn ádemi, oılaǵanymyzdaı isteımiz dep oılaımyn», - dedi I.Ilın.
Sonymen qatar ataqty chempıon balaqaılarǵa armanǵa qol jetkizýdiń syrymen de bólisti.
«Qyzylordada № 198 mektepte oqyǵan qarapaıym baladan álem rekordtaryn jasaıtyn chempıon shyqty. Barlyq adamdar osyndaı jetistikterge jete alady. Boıyńda ózińe tán daryn bar. Soǵan senseńiz bolǵany. Óz darynyn taba almaı júrgender de bar, ol maqsatyńa baılanysty. Júrektiń túbine tereń boılasańyzdar, úlken maqsattaryńyzdy tabasyzdar. Men, mysaly, Qyzylordada Syrdarııa boıyndaǵy Qorqyt Atanyń eskertkishi janynda túngi aspanda aǵyp qulap bara jatqan juldyzdarǵa qarap armandarymdy aıtatynmyn. Sol armandardyń jolynda ter tógip, onyń oryndatyp kelemin. Eresekter men balalarǵa aıtarym, ol armandar oryndalady. Olar bizdiń boıymyzda jáne biz olardyń ómirde oryndalýyna qoldan kelgenimizdi jasaı alamyz. Ózińe qatty senseń bolǵany», - dep atap ótti.
Sóz sońynda eki dúrkin olımpıada chempıony bolashaqta taǵy eki olımpıada altynyn alýdy armandaıtyndyǵyn, oǵan jetý úshin barlyq kúshin sarp etetinin jasyrmady.
«Mende birqatar maqsattarym bar, olar jınaqtala kele bir arman quraıdy. Men 4 márte Olımpıada chempıony atanǵym keledi. Mundaıǵa birde-bir adam álemde qol jetkizbegen. Bul - meniń eń úlken armanym», - dep túıdi oıyn I.Ilın.
