Jer jaqsy kóktegen — SQO-da bıyl shóp byltyrǵydan eki ese arzan

PETROPAVL. KAZINFORM – Soltústik Qazaqstan oblysynda sharýalar bıyl qalyń shyqqan shópti shaba almaı otyr. Kúnara jaýǵan jańbyr naýqanǵa qyzý kirisýge mursha bermeı jatyr. 

Shabyndyq jerlerde shóp belýardan keledi. Aqjar aýdanynyń turǵyny Nazymbek Eginbaıulynyń aıtýynsha, jaýyn-shashyn saldarynan aýyl turǵyndary iske bel býyp kirise almaı otyr. 

«Aldymen qoradaǵy malǵa qysqyǵa shóp jınap, artylǵanyn satamyz. Shapqan shóp dalada jatyr, biraq jınap ala almaı otyrmyz, kúnara jaýyn, keppeıdi. Byltyr qýańshylyq boldy, salmaǵy shamamen 300 kelilik úlken orama shópterdi ortasha 15 myń teńgeden satty. Bıyl suranys az bolatyn syńaıly, ázirge oramalarǵa 6-9 myń teńge aralyǵynda surap jatyr», - deıdi aýyl turǵyny.

SQO aýyl sharýashylyǵy jáne jer qatynastary basqarmasynyń málimetinshe, óńirge maldyń jaıly qystap shyǵýy úshin 940 myń tonna shóp, 234,6 myń tonna pishen, 278,1 myń tonna súrlem, 867 myń tonna saban jáne 818 myń tonna jem qajet.

Onyń ishinde turǵyndardyń qorasyndaǵy malyna 420 myń tonnadan astam shóp, sonsha shamada saban jáne 277 myń tonna jem ázirleý kerek.

«Jalpy oblys boıynsha 379 myń ga jerge mal azyqtyq daqyldar egilgen. Kópjyldyq ekpe shóp mal azyqtyq alqaptardyń 52 % alyp jatyr. Sońǵy jedel aqparatqa saı óńirde 488,3 tonna shóp daıyndaldy. Bul josparlaǵan kólemniń 52 % teń», – deıdi basqarmanyń baspasóz hatshysy Anastasııa Harlamova.

Buǵan deıin elimizde bıdaı, maqta, kúrish egý qysqartylǵanyn jazǵan edik.