Jer zańnamasynyń jetildirilýine atsalysýymyz kerek – Álı Bektaev
NUR-SULTAN. QazAqparat – Parlament Májilisine ótetin-ótpeıtinimizdi saılaý sheshedi, biraq zańnamanyń jerdi Qazaqstannyń aýylsharýashylyǵy eńbekkerleriniń ózi ıemdenip, ózi ıgerýine jaǵdaı jasaıtyndaı etip ózgerýine atsalysýymyz kerek. Bul týraly «Aýyl» halyqtyq-demokratııalyq patrıottyq partııasy ótkizgen semınarda aıtyldy, dep habarlaıdy QazAqparat tilshisi.
«Jer máselesi – kún tártibinen túspeı turǵan suraqtardyń biri. Ózderińiz biletindeı, Prezıdent Jer zańnamasyna moratorıı jarııalaǵan. Kóptegen másele Jer zańnamasynyń jetildirýin kútip otyr. «Aýyl» partııasynyń aýylǵa, aýyl sharýashylyǵy sektoryna tikeleı qatysy bar, sondyqtan jerge qatysty máseleniń barlyǵyna aralasýymyzǵa týra keledi. Parlament Májilisine ótetin-ótpeıtinimizdi saılaý sheshedi, biraq jerdiń sheteldikterge satylmaý, sheteldikterge jalǵa berilmeý máselelerine, zańnamanyń jerdi Qazaqstannyń aýylsharýashylyǵy eńbekkerleriniń ózi ıemdenip, ózi ıgerýine jaǵdaı jasaıtyndaı etip ózgerýine atsalysýymyz kerek», - deıdi «Aýyl» halyqtyq-demokratııalyq patrıottyq partııasynyń tóraǵasy Álı Bektaev.
Onyń aıtýynsha, mundaı semınar-trenıng bolashaqta jıi ótkiziletin bolady.
«Aýyl sharýashylyǵyna qatysty másele kóp. Bolashaqta aýyl sharýashylyǵy kooperatsııasy týraly, aýyl sharýashylyǵyndaǵy jaıylym máselesi boıynsha, aýyl sharýashylyǵy ónimderin qaıta óńdeýge qatysty, taza organıkalyq ónimderdi óndirý máselesi boıynsha, sondaı-aq ulttyq qundylyqqa, tilge qatysty semınar-trenıng ótkizemiz», - deıdi ol.
