Jer zańnamasyn buzǵan ákimder jaýapkershilikke tartylady - Mahambet Dosmuhambetov

ATYRAÝ. QazAqparat - Atyraý oblysynyń ákimi Mahambet Dosmuhambetov Qoǵamdyq keńestiń keńeıtilgen otyrysynda paıdalanylmaǵan jer telimderin memleketke qaıtarý týraly tapsyrma berdi, dep habarlaıdy QazAqparat Atyraý oblysynyń Óńirlik kommýnıkatsııalar qyzmetine silteme jasap.

«Bul Elbasy men Prezıdenttiń baqylaýyndaǵy tapsyrma. Menshik ıeleriniń jáne jer paıdalanýshylardyń paıdalanylmaǵan nemese maqsatqa saı paıdalanylmaǵan jer telimderin anyqtap, qaıtarý, basqa da buzýshylyqtardy boldyrmaý jumystary qarqyndy júrgizilýi kerek», -dep atap kórsetti Mahambet Dosmuhambetov.
Berilgen jer telimderindegi buzýshylyqtar týraly Atyraý oblystyq Qoǵamdyq keńesiniń tóraǵasy Murat Óteshev aıtty. Monıtorıng qorytyndysy boıynsha problemanyń basym kópshiligi aımaqtaǵy eki aýdanda ǵana - Mahambet, Isataı aýdandarynda anyqtalǵan. Mysaly, sońǵy úsh jylda Isataı aýdanynda 18 myń ga jer maqsatqa saı paıdalanylmaǵan. Mahambet aýdanynda kórsetkish budan da joǵary – 23,3 myń gektar.
«Saraptama jumystary jer telimderiniń zańsyz berilýi aýdan ákimderi men jer qatynastary bólimi basshylarynyń kinási ekenin anyqtady, óıtkeni, ruqsat qujattaryn jergilikti atqarýshy organdar beredi» , - dedi Murat Óteshev.
Qoǵamdyq keńes tóraǵasy kommertsııalyq maqsatta berilip, keıin menshik ıeleri jeke qurylystaryn júrgizgen jer telimderin mysalǵa keltirdi. Osylaısha kóptegen úıler zańsyz dep tanylyp otyr. Bul jaǵdaı aýyl sharýashylyǵy qajettiligine berilgen jer telimderine de qatysty. On myńdaǵan gektar jer uzaq jyldar boıy paıdalanylmaı keledi. Birqatary sot sheshimimen memleketke qaıtarylǵan, biraq problema áli bar. Oblys ákimi quzyrly organdarǵa jerdiń berilýi men paıdalanylýyna monıtorıng pen baqylaý júrgizýdi tapsyrdy.
«Biz bar baılyǵymyzdy tıimdi paıdalanýymyz kerek. Jer telimderin berý, zańsyz qurylys salýǵa qatysty qabyldanǵan zańsyz sheshimder az emes. Paıdalanylmaǵan jer telimderi problemasy da bar. Árıne bul máselelerdi bir kúnde sheshý múmkin emes, biraq zańdy túrde sheshim qabyldaýymyz kerek. Endi ondaı buzýshylyqtarǵa jol bermeý qajet. Onsyz bul problema tek tereńdeı beredi», - dep qadaı aıtty Mahambet Dosmuhambetov.

Aımaq basshysy qala men aýdan ákimderine jer telimderin berý kezinde barlyq quqyqtyq rásimderdi saqtaý kerektigin tapsyrdy.
«Osy normalardy buzǵan ákimder jeke jaýapkershilikke tartylady. Kommertsııalyq maqsatqa jáne aýyl sharýashylyǵyna jer telimderi aýktsıon, konkýrs arqyly berilýi tıis. Jeke turǵyn úı qurylysyn júrgizýge jer telimi kezek boıynsha beriledi. Injenerlik ınfraqurylym júrgizilmegen jer de berilmeıdi. Zańsyz dep tanylǵan jerlerdegi jeke qurylystardy toqtatý kerek», - dep qorytyndylady Mahambet Dosmuhambetov.