Jer zańyn buzǵandarǵa 500 mln teńge aıyppul salyndy

ASTANA. KAZINFORM — 2024 jyly Jer resýrstaryn basqarý jónindegi komıtet júrgizgen tekserýlerdiń qorytyndysy boıynsha 3,7 myń ákimshilik is qozǵalyp, 500 mln teńge aıyppul salynǵan.

— 2024 jyly Jer resýrstaryn basqarý jónindegi komıtettiń aýmaqtyq bólimsheleri «Azamattarǵa arnalǵan úkimet» memlekettik korporatsııasynyń, jer quqyqtyq qatynastary sýbektileriniń, jergilikti ákimdikter men fılıaldarynyń ústinen 6,5 myńǵa jýyq tekserý júrgizdi. Tekserý qorytyndylary boıynsha jer zańnamasyn buzýdyń 5,3 myńǵa jýyq faktisi belgili boldy. 3,7 myńǵa jýyq ákimshilik is qozǵalyp, 500 mln teńgege jýyq somaǵa aıyppul salyndy, — delingen Premer-mınıstrdiń jaýabynda.

Jaýaptaǵy málimetke súıensek, kóbinese memleket menshigindegi jerge qol suǵý, aýylsharýashylyq alqaptardy tıimsiz paıdalaný nemese paıdalanbaý, berilgen telimniń qoldanys maqsatyn buzý, jerge ıelik etý quqyǵyn berýde zań buzý, memlekettik jer kadastryn júrgizýdiń qatelikteri, jerdi jaramsyz kúıge túsirý sııaqty zań buzý faktileri tirkelgen.

Depýtattyq saýalda Soltústik Qazaqstan, Almaty, Pavlodar, Shyǵys Qazaqstan oblystarynda jer zańnamasyn óreskel buzýdyń faktileri kórsetilgen. Oljas Bektenov atalǵan zańsyzdyqtarǵa jaýapty adamdardyń bári ákimshilik jaýapkershilikke tartylǵanyn aıtady.

Eske salsaq, Almaty oblysy Eńbekshiqazaq aýdanynda adamdardy «jer alyp beremin» dep aldaǵan 62 jastaǵy áıel ustalǵan edi.