Jer úılerdi sý baspaý úshin aýladaǵy qardy tazalaý kerek - Astana ákimdigi
ASTANA. QazAqparat - Astana qalasynyń ákimdigi kóktemgi sý tasqynynyń aldyn alý jumystary jóninde baıandady, dep habarlaıdy QazAqparat tilshisi.
«Astanada jyl basynan beri 3 mln tekshe metrden astam qar jınalyp, qala syrtyna shyǵaryldy. Qazirgi tańda kommýnaldyq qyzmetter táýlik boıy qar tazalaýmen aınalysyp jatyr. Ótken táýlikte 30 myń tekshe metrden astam qar shyǵaryldy», - dep málimdedi Astana qalasy ákimdiginiń baspasóz hatshysy Elvıra Júrgenbaeva ákimdikte ótken baspasóz máslıhatynda.
Onyń aıtýynsha, ákimdikte sý tasqynyna qarsy sharalar boıynsha arnaıy keshendi jospar bekitilgen. Josparǵa sáıkes, qazirgi ýaqytta Astanada sý tasqyny qaýpi bar 27 oryn belgilengen. Bul oryndar ákimshiliktiń jiti nazarynda. Qala boıynsha jaǵdaı turaqty.
Sonymen birge, E. Júrgenbaeva ótken aptada qar aralas jańbyr jaýǵanda Astanadaǵy birneshe úıdiń sý basýyna qatysty pikir bildirdi.
«Sý basqan jer úılerdi ákimdiktiń qyzmetkerleri tekserdi, olar óz aýlalarynan qardy shyǵarmaǵan bolyp shyqty. Sondyqtan, Astana qalasynyń ákimdigi jer úı aýlasyndaǵy qardy shyǵarý qajettigin taǵy da eskertedi. Aýa raıy jylynyp, erigen qar sýy turǵyn úıge jetýi múmkin. Kóshege shyǵarylǵan qar tazalanbaǵan jaǵdaıda 109 qyzmetine habarlasyp, shaǵym túsirýge bolady», - dep jaýap berdi baspasóz hatshysy.
Foto: om-saratov.ru
