Jer úıdiń murjasyn bir qysta neshe ret tazartý kerek – maman keńesi

ASTANA. KAZINFORM – Astana qalasy tótenshe jaǵdaılar departamenti memlekettik órt baqylaý basqarmasy basshysynyń orynbasary Ǵabıt Babaev jer úıdegi pesh murjasyn bir qysta neshe ret tazartý kerektigin aıtty.

– Jalpy murjany jylytý maýsymy bastalar kezde tazartyp, daıyndap qoıý kerek. Al jylytý maýsymynyń kezeńinde keminde úsh ret tazartýdy usynamyz. Odan kem bolmaý kerek. Sebebi órtterdiń keıbiri osy murjanyń aqaýynan shyǵyp jatady. Sondaı-aq kómirqyshqyl gazyna ýlaný faktileri murjanyń bitelýinen bolyp jatady, - dedi ol.

Aıtýynsha, Astanada kún sýytqannan beri ys tııý faktileri jıilegen.

– Kúnniń kúrt sýytýyna baılanysty kómirqyshqyl gazyna ýlaný faktileri oryn alyp jatyr. Murjanyń bitelýi, pesh qabyrǵasynyń jarylýy saldarynan ýly gaz taraıdy. Osyǵan baılanysty peshtiń tehnıkalyq jaǵdaıyna basa mán bergen jón, - dedi maman.

Eske salsaq, eki kún buryn Astanadaǵy «Gamma» turǵyn úı kesheninen órt shyqqan bolatyn.