Jer úıde pesh jaqqan kezde órtten qalaı saqtaný kerek - maman keńesi

ÓSKEMEN. QazAqparat – Shyǵys Qazaqstan oblysynyń qutqarýshylary úıdi peshpen jylytqan kezde órtten qalaı saqtaný qajettigin túsindirdi, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, qys kezinde jer úılerde órt shyǵýdyń negizgi sebepteriniń biri – jylytý peshteri bolyp otyr.

Osy jyldyń 11 aıyndaǵy kórsetkish boıynsha óńirde peshti paıdalaný kezinde qaýipsizdik talaptarynyń saqtalmaýynan 284 órt tirkeldi, bul jalpy órt sanynyń 15%-yn quraıdy.

«Demalys kúnderi úı ıeleri monsha jaqqanda da jıi órt shyǵyp jatady. Osy rette turǵyndardy asa saq bolýǵa shaqyryp, jylytý peshteriniń talapqa saı bolýy qajettigin eskertemiz» dep habarlady vedomstvo ókilderi.

Mamandardyń aıtýynsha, pesh qubyry men murjasynyń tym joǵary temperatýrada bolýynan ot tutanýy qaýpi bar.

Budan bólek, tútindiktegi jaryqtan gaz ben ushqynnyń janǵysh materıaldarǵa taralýynan jalyn shyǵýy yqtımal.

«Órttiń jáne ıis tııýdiń aldyn alý úshin birqatar saqtyq sharalaryn qaperińizde ustańyz. Pesh pen murja sylanǵan, aqtalǵan bolýy qajet. Jylytý maýsymy kezinde murjany eki aıda keminde bir ret tazalaý kerek. Peshtiń mańaıyna, ústine kıim jaıyp, aıaq kıim keptirýge, jıhazdy peshke jaqyn qoıýǵa tyıym salynady. Sonymen qatar pesh jaqqan kezde otty tez tutatatyn suıyqty paıdalanýǵa, janyp jatqan peshti qaraýsyz qaldyrýǵa bolmaıdy. Peshti únemi tekserip, sańylaýy bolsa bitep tastaǵan abzal» deıdi mamandar.