Jer úlestirýde jemqorlyq jıi tirkelgen óńirler belgili boldy

NUR-SULTAN. QazAqparat - QR Sybaılas jemqorlyqqa qarsy is-qımyl agenttigi Aldyn alý departamentiniń basshysy Anar Jarova jer qatynastary salasyndaǵy jemqorlyq faktiler týraly baıandady, dep habarlaıdy QazAqparat tilshisi.

Onyń aıtýynsha, jer qatynastary - sybaılas jemqorlyq faktileri jıi tirkeletin salaǵa aınaldy.

«Jer telimin alý jáne rásimdeý sybaılas jemqorlyq sebepteriniń úzdik bestigine enip otyr. Oǵan «Transparensı Qazaqstan» uıymynyń áleýmettik saýalnamasy dálel.Turǵyndar men bıznes ókilderiniń 60 paıyzy jer telimin zańsyz rásimdeýge tap bolǵan. Zertteýge sáıkes, óńirler arasynda Almaty (26,4%), Atyraý (9,4%), SQO (9,4%), Qaraǵandy (7,5%), ShQO (7,5%), Aqmola (7,5%) oblystarynda jemqorlyq faktileri jıi kezdesken», - dedi Anar Jarova agenttikte ótken baspasóz máslıhatynda.

Spıkerdiń aıtýynsha, sońǵy úsh jylda jer qatynastary salasynda 300-den astam jemqorlyq faktileri anyqtalǵan.

«Saldarynan 105 adam qylmystyq jaýapkershilikke tartylyp, 87 adam sottaldy. Onyń basym bóligi - Túrkistan (20), Mańǵystaý (15), Jambyl (14), Aqmola (11), Almaty (9) jáne Pavlodar (9) oblystarynda jumys istegen laýazymdy tulǵalar. Ásirese, bul qylmystar alaıaqtyqpen, óz qyzmetin asyra paıdalaný, qujat rásimdeýde, jer bólýde para alý, jalǵa alý merzimin uzartý, aýktsıon jeńimpazyn zańsyz anyqtaýmen tyǵyz baılanysty», - dedi departament basshysy.

Osyǵan baılanysty agenttik pen «Atameken» UKP jer qatynastary salasynda taldaý júrgizip, jemqorlyqqa ákep soǵatyn birneshe sebep-saldardy anyqtaǵan.

«Negizgi máselelerdiń biri - aqparattyń qoljetimdi bolmaýy. Ásirese bul baǵytta jergilikti atqarý organdarynyń jumysy kóńil kónshitpeıdi. Olar óz ınternet-resýrsynda bas jospardyń, egjeı-tegjeıli josparlaýdyń jáne ınjenerlik kommýnıkatsııalar shemalaryn toqsan saıyn jarııalaýǵa mindetti. Tekserý júrgizgende saıttardaǵy aqparattyq tolyq emestigi anyqtaldy. Bul sybaılas jemqorlyq qaýpin arttyrady», - dedi Anar Jarova.