Jer ýchaskesin erekshe qorǵalatyn tabıǵı aýmaqtar qataryna qaıtarý protsesi jeńildetiledi

NUR-SULTAN. QazAqparat – Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat tilshisi.

Zań jobasy 2020 jylǵy 3 maýsymda birinshi oqylymda maquldandy .

Zań jobasyn ázirleýdiń negizgi maqsaty - týrızm obektilerin, sý sharýashylyǵy qurylys jaılaryn salý jáne olardyń jumys isteýi, Memlekettik shekara obektilerin jaılastyrý men olardyń jumys isteýi, qorǵanys muqtajy úshin buryn erekshe qorǵalatyn tabıǵı aýmaqtardyń quramynan shyǵarylǵan ári kórsetilgen maqsatta paıdalanylmaıtyn bosalqy jerdi olardyń quramyna qaıtarý rásimin ońaılatý.

«Bul ózgerister ekologııalyq, ǵylymı, tarıhı-mádenı jáne rekreatsııalyq jaǵynan erekshe qundy ári qaıtarylatyn jer ýchaskelerinde ornalasqan tabıǵı-qoryq qorynyń tabıǵı keshenderi men obektilerin saqtaý qajettiliginen týyndap otyr. Bul rette, mundaı jerdi aýystyrý týraly sheshim memlekettik ekologııalyq saraptamanyń oń qorytyndysy bolǵan kezde jáne jaratylystaný-ǵylymı, sondaı-aq tehnıkalyq-ekonomıkalyq negizdemelerdiń jobalaryn ázirlemeı erekshe qorǵalatyn tabıǵı aýmaqtyń sanatyna baılanysty qabyldanatyn bolady», - dedi Májilis depýtaty Aıqyn Qońyrov.

Zań jobasynda 2 zańnamalyq aktige: Jer kodeksine jáne «Erekshe qorǵalatyn tabıǵı aýmaqtar týraly» Zańǵa ózgerister men tolyqtyrýlar engiziledi.

Jumys toby zań jobasyn jumys tobynyń 3 otyrysynda jáne bas Komıtettiń keńeıtilgen 2 otyrysynda talqylaý barysynda ýákiletti memlekettik organdar ókilderiniń qatysýymen 15-ke jýyq túzetýdi qarady.

Sonyń nátıjesinde, qujatqa zań jobasyn ázirleýdiń negizgi maqsatyna baılanysty, sondaı-aq zań jobasynyń normalaryn Qazaqstan Respýblıkasynyń qoldanystaǵy zańnamasyna jáne zań tehnıkasynyń qaǵıdalaryna sáıkes keltirý bóliginde redaktsııalyq-naqtylaýshy sıpattaǵy túzetýler engizildi.