Jer ýchaskelerine memlekettik aktilerdi berý qyzmeti tolyqtaı onlaın formatqa kóshedi
ASTANA. KAZINFORM – 12 shildeden jer ýchaskelerine memlekettik aktilerdi berý jónindegi memlekettik qyzmet Halyqqa qyzmet kórsetý ortalyqtarynda (HQO) kórsetilmeıdi.
Endi memlekettik aktini rásimdeýge ótinimdi tek eGov.kz portaly arqyly ǵana berýge bolady. Bul ózgerister Aýyl sharýashylyǵy mınıstrliginiń buıryǵyna sáıkes kúshine enedi.
Qyzmetti alý úshin paıdalanýshy eGov.kz portalyna kirip, jer ýchaskesine memlekettik aktini berý qyzmetin tańdap, qajetti málimetterdi toltyryp, ótinimge elektrondyq sáıkestendirýdiń qoljetimdi tásilderiniń biri arqyly qol qoıýy qajet. Ótinim qaralǵannan keıin daıyn nátıje paıdalanýshynyń Jeke kabınetinde qoljetimdi bolady.
Memlekettik qyzmetti alý tártibi týraly tolyq aqparat eGov.kz portalyndaǵy qyzmet pasportynda ornalastyrylǵan.
— Buǵan deıin jer ýchaskesine memlekettik aktini alý úshin azamattar HQO-ǵa jeke júginýge mindetti bolatyn. Qazirgi tańda mundaı qajettilik is júzinde joıyldy, óıtkeni ótinimderdiń 96%-y onlaın formatta beriledi, al 12 shildeden bastap qyzmet kórsetý protsesi tolyqtaı tsıfrlyq formatqa kóshirildi. Endi eGov.kz portalynda ótinim berip, oǵan ETsQ arqyly qol qoıyp, daıyn qujatty jeke kabınetten alý jetkilikti. Osyǵan uqsas tásilmen suranysqa ıe TOP-10 memlekettik qyzmetti tsıfrlandyrý jumystary júrgizilýde. Búginde bul tásil naqty nátıjesin kórsetip otyr: HQKO operatorlaryna túsetin júkteme 30%-ǵa tómendedi. Sonyń nátıjesinde myńdaǵan azamat memlekettik qyzmetterdi HQO-ǵa barmaı, kezekte kútpeı-aq áldeqaıda jyldam ala bastady, — dedi Jasandy ıntellekt jáne tsıfrlyq damý mınıstrliginiń birinshi vıtse-mınıstri Rostıslav Konıashkın.
Búginde onlaın formatta qoljetimdi memlekettik qyzmetterdiń qatarynda jyljymaıtyn múlikke tehnıkalyq pasport pen onyń telnusqasyn berý, elektrondyq tsıfrlyq qoltańba (ETsQ) alý, turǵylyqty jeri boıynsha tirkelý, júrgizýshi kýáligin alý, eńbekshi kóship kelýshilerge ruqsattardy berý jáne olardyń qoldanylý merzimin uzartý sııaqty qyzmetter bar.
Sonymen qatar, eger azamatta qyzmetti onlaın alý úshin qajetti jaǵdaılar bolmasa, ol HQO-daǵy ózine-ózi qyzmet kórsetý aımaqtaryn paıdalanyp, memlekettik qyzmetti derbes rásimdeı alady.
Aıta ketelik Pavlodar oblysynda memleket menshigine 2 myń gektardan astam jer qaıtaryldy.
