Jer ýchaskelerin durys paıdalanbaıtyndardyń «qara tizimi» túziledi - B. Smaǵulov
ASTANA. 5 jeltoqsan. QazAqparat -Qazaqstanda jer ýchaskeleri men jerdi durys paıdalanbaı otyrǵandardyń tizimi jasalmaq. Bul týraly búgin Óńirlik damý mınıstrliginde Memleket basshysynyń tapsyrmalaryn oryndaý máselelerine arnalǵan keńeste Jer resýrstaryn basqarý komıtetiniń tóraǵasy Baýyrjan Smaǵulov málim etti.
Komıtet tóraǵasynyń aıtýynsha, búgingi kúni Parlament Májilisine jer qatynastaryn retteý máselesine arnalǵan zań jobasy engizilgen. «Onda birqatar máseleler qarastyrylyp otyr. Birinshiden - jer ýchaskelerin durys paıdalanbaǵandar men jerdi teris maqsattarǵa paıdalanyp otyrǵandardyń reestri túziledi. Bundaı reestrdi qurý men ony engizý negizinen zań talaptary men normalaryn buzýshylardyń aldyn alýǵa baǵyttalady. Al reestrge engen tulǵalarǵa odan keıingi ýaqyttarda jer ýchaskelerin berýde shekteýler qarastyrylýy múmkin», - deıdi B. Smaǵulov. Onyń sózine qaraǵanda, bundaı tizilim memlekettik satyp alýlarǵa jaýapsyz qaraǵandardyń reestrine uqsas, ortalyqtandyrylǵan júıe boıynsha júzege asatyn bolady.
«Budan bólek, zań jobasymen jer ýchaskeleriniń ıeleri men jerdi paıdalanýshylar úshin kelisimshartta qarastyrylǵan ereje men sharttar oryndalmaǵan jaǵdaıda ákimdikter birjaqty tártippen ondaı kelisimsharttardy buza alatyn bolady. Sonymen qatar, zań jobasyndaǵy normalarǵa sáıkes, paıdalanylmaǵan nemese zań talaptaryn óreskel buza otyryp paıdalanylǵan jer ýchaskelerin májbúrli túrde alyp qoıýdyń jańa tártipteri bekitiledi», - deıdi komıtet tóraǵasy.
