Jer ýchaskelerin berý máselesi: Ákimdikter bar qarjyny almaı otyr
«Osy jerde qazir ákimdikter selektorda otyr ǵoı. Byltyr bıýdjetti josparlaǵanda bizde (jer ýchaskelerine ınfraqurylym jelilerin tartýǵa - avt.) 80 mlrd teńge arnaıy bólingen bolatyn. Biraq ákimshilikterdiń bergen qujattary tek 38 mlrd teńge boldy. Bul degenimiz, bıyl ol ınfraqurylymdy salmasaq, onda kele jatqan 2019-2020 jyldarda turǵyn úılerdi sala almaımyz», - dedi J.Qasymbek mınıstrliktiń keńeıtilgen alqa májilisinde.
Mınıstrdiń aıtýynsha, aldaǵy eki-úsh aıdyń ishinde respýblıkalyq bıýdjet naqtylanatyn bolady. «Sondyqtan ákimshilikterge aıtarymyz, kerek qujattardy osy bir-eki aptanyń ishinde bizge tapsyrýlaryńyz qajet. Barlyǵyn saraptamadan ótkizip, mınıstrlikke berý kerek. Bizde qazir oǵan bólingen qarjy bar. Osy aıdyń ishinde ony istemesek, onda oblysqa qarjy jiberilmeıdi degen sóz», - dep atap kórsetti J.Qasymbek.
Aıta keteıik, elimizde jyl saıyn 40-50 myń jer ýchaskesine ınfraqurylym jelilerin tartý josparlanǵan. «Qazirgi kelgen 40 mlrd-tyń ishinde 15 mlrd teńgeni ǵana JTQ-ǵa (jeke turǵyn úı qurylysy), ıaǵnı 15 myń ýchaskege (ınjenerlik jelilerdi tartý úshin - avt.) dep otyr. Bul - ákimdikterdiń esebi. Negizi, biz taǵy da 40 mlrd alamyz dep otyrmyz. Óıtkeni jyl saıyn «Nurly jer» boıynsha 80 mlrd teńge berilýi kerek. Biz, kem degende, 40 myń ýchaskege ınfraqurylym aparýymyz qajet. Ákimdikter áli de óz esepterin beredi. Qazirgi qujattar boıynsha 15 myń ýchaske beriledi degen jospar bar. Jalpy, osy kórsetkishti 40 myńǵa deıin jetkizýimiz kerek», - deıdi QR Investıtsııalar jáne damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marxabat Jaıymbetov.
